Serchhip District-ah VDP tha tak din dan tur leh sualna do kawnga hmalak dan tur sawihona neih a ni

Serchhip District chhunga khua leh Veng hrang hrangah Village Defence Party (VDP) din a nih theih nan leh a awmsa te tuaithar a nih theih nan hmalakna kalpui mek a ni.
Mizoram Police ten hemi kawnga hmalakna an kalpui mekah hian nimin khan Chhingchhip Venghlun Community Hall-ah Chhingchhip-a VDP hruaitute tan intuaitharna hi neih niin he hun hi Serchhip SP Stephen Lalrinawma chuan a hmanpui a, Serchhip SP chuan tunlai-a sualna chi hrang hrang hluar mek leh ruihhlo hluar mek dona kawnga sawrkar mi leh sa te chauh ni lovin khawtlang mipuite, tlawmngai pawl leh VDP te tanrual a tul thu sawiin, nasa zawka heng sualna kan beihlet a pawimawh thu leh tun aia tha leh inpawhna tha zawk nen an thawhho a tul thu a sawi a. Chhingchhip khawtlang in an khuaa Police Out-Post hmun tur an pek bawhzuina chungchanga zawhna pawh chhangin Serchhip SP chuan, harsatna hrang hrang a awm avangin sawrkar pawhin a duh ang leh tha a tih anga hma a lak vek theih loh thu leh hmalakna erawh kalpui reng a nih thu a sawi bawk a ni.


He hmalakna hnuaiah hian nimin khan Serchhip khawpui chhung leh Keitum khuaa VDP bakah Serchhip Sub-Hqrs. YMA hnuaia Sub-Hqrs. Anti-Drug Squad (SADS) te chuan Serchhip Police Station Conference Hall-ah Meeting neiin hmalak dan tur an sawiho bawk a, he hun hi Serchhip SDPO Kaste Romalsawma chuan hmanpuiin Police Hqrs. lama an hotu ten Veng leh khaw hrang hrangah VDP te tuaithara a la awmlohna ah din leh Police te ten thawhhona tha lehzual a awm theih nana hma la tura an tih anga he hun hi buatsaih a ni tih a sawi a. VDP chu Police hnuaia din, Police te nen thawkho tur an ni tih sawiin, khawtlang in JAC emaw, sual do pawl emaw a din te nen a inang lo tih a sawi a. Tunhnaiah Mizoram-ah ruihhlo a hluar thu leh Police leh Excise and Narcotics Department te pawhin an man tam thu sawiin, amaherawh chu heti chung hian ruihhlo erawh ala hluar hle tih a sawi a. Hei vang hian khua leh Veng hrang hrangah VDP hi din a nih chuan ruihhlo dona kawngah pawh awmze nei zawka tanrual theih beisei a nih thu leh sualna do kawngah pawh hma kan sawn ngei a beisei thu a sawi bawk.

He hun hi Serchhip Police Station OC, SI C. Lalremthanga chuan kaihruaiin he huna tel te chuan Myanmar atanga raltlan lo lut ten zalen taka ramri an kan avang leh an kartawn chhen avanga ruihhlo, a bikin Heroin No. 4 a hluar ta hle nia an hriat thu sawiin, ruihhlo hluar avang hian khawtlang ah rukruk leh pawikhawihna dang te a hluar phah hle nia an hriat thu te, Veng hrang hrang te ruihhlo dona kawngah pheikhai rual zawka thawh tlan a tul nia an hriat thu te, ruihhlo ti thin ten inchiuna hriau thianghlim an hman theihna tura Drop-in-Centre te Needles exchange kalpui thin dan chu tha tawk lo leh zalen lutuk nia an hriat thu te, ruihhlo do hna thawktu sawrkar department lam te pawhin tun aia nasa lehzuala hma an lak a tul thu te pawh an sawilang bawk. Hetiang hun hi nimin khan North Vanlaiphai-ah pawh hman niin niminpiah khan Thenzawl-ah hman a lo ni tawh bawk a ni.

Comments

Popular posts from this blog

Tukverh-a tlasual boral