Mizoram-a ASF hri leng in ziaawm lam a pan

Kumin March thla bul atanga Mizoram-a leng nawn Vawk hri leng, African Swine Fever (ASF) avanga nitin-a Mizoram-a Vawk thi chu a tlem chho zel a, he Vawk pulhri leng hi a reh dawn hnai ni a ngaih a ni.

ASF Vawk hri leng hi August thla laihawl vel atang khan a ziaawm tan a, nitin-a Vawk thi zat pawh a tlem chho zel a, nimin khan he Vawk hri vanga Vawk thi hi Mizoram pumah pakhat chauh a awm a, Vawk thi awmchhun hi Lawngtlai District-a Tialdawngilung khua ami a ni a, Inrinni khan Vawk 4 thiin, Kolasib leh Serchhip District-ah 2 ve ve a ni.

Heti hian kumin March thla a ASF Vawk pulhri a len nawn leh atanga ASF vanga Vawk thi tawh zawng zawng hi 10,399 a ni a, Vawk hri hian District 11-a Khua leh Veng 143 a tuam a. Vawk hri darh zel tur venna atan nimin khan Vawk 2 suat a ni a, heng te nen hian kumin ah Vawk 8,941 suat a ni tawh a. ASF hri lenna a la puan loh khuaah nimin khan Vawk pakhat bawk thiin ASF vanga thi ni a rinhlelh, mahse finfiah si loh avanga thi hi khaw 70-ah 911 a awm tawh a ni.

Nikum-a Mizoram-a ASF Vawk hri a len hmasak ber khan he hri avanga Vawk thi finfiah hmasak ber, March ni 21-a Lungsen khua ami hmuhchhuah a nih atangin Vawk 33,000 chuang a thi a, Vawk sing khat chuang suat a ni bawk a, Vawk suat neitute hnenah hian zangnadawmna sum pekchhuah thuai beisei a nih thu AH&Vety Department hotute chuan an sawi bawk a ni.