Sawrkar hnathawk ten hlawh an la tlai leh dawn

Mizoram sawrkar sum harsatna thleng mek vangin sawrkar hnathawkte August, 2022 hlawh lak hun a tlai leh dawn nia thudawn a ni a, hetihlai hian hlawh buaipuitu, Drawing and Disbursing Officer (DDO) te chuan hlawh tur Treasury-ah an thehlut mek nia thudawn a ni.

Sawrkar hnathawk nghet leh a nghet loa thawkte hlawh lak hun hi a inang lova, a nghet lo a thawk, Muster Roll, Workcharge leh Provisional Employee te chuan ni 20 chho vel atangin hlawh an la thin a, a nghet lo a thawkte chu August 5 atang khan July thla hlawh pek an lo ni tawh a, pension leh a nghet a thawkte pawh August 10 khan pek an lo ni tawh bawk. Finance Department hotute sawi danin, thla dang aia sawrkar hnathawkten July thla hlawh an lak tlai hnuah August thla hlawh pawh sum harsatna vangin an la tlai leh dawn a, hlawh pek theih hun tur hi sawi mai theih a la ni lo bawk. Finance leh Treasury Official-te sawi danin Mizoram sawrkar hnathawkte hlawh atan hian thla khatah cheng vbc. 330 vel mamawh thin a ni.