Central YMA in Anti-Drug Squad an din leh ta

Central YMA rorelna sang, Central Executive Committee (2021-2023) Meeting vawi 16-na chuan ruihhlo do tur, 'Central Anti Drugs Squad' (CADS) a din a, Central YMA President R. Lalngheta chuan drugs bikah hma an la dawn tih a sawi.

Nizan hmasa a CEC thutkhawm Central YMA Office, Tuikhuahtlang-a neih chuan ruihhlo in kan ram min run mekna te thlir chungin Central YMA hnuaiah ruihhlo do tur - Central Anti Drugs Squad (CADS) din leh a remti a, September 9, 2022 (Zirtawpni)-ah member te lawmna leh hlanna hun hman a ni ang. CADS term hi thla hnih (2) chhung zel ni tura ruahman niin, member 50 zel an awm anga, CADS member turin Aizawl khawpui chhunga Branch YMA 108 atangin mi pakhat (1) theuh ruat tura beisei an ni.

Central YMA President R. Langheta chuan CADS din chungchang ah hian Drugs bikah hma an la dawn tih sawiin, Mizoram a ruihhlo tam zia mipui leh Kohhran thlenga sawi a nasat tawh thu te a sawi a. CADS din thar leh tur chu Aizawl City Branch hruaitute an kohkhawm ah pawh pawm a lo ni tawh tih sawi bawkin, “Kan ramah ruihhlo ti thar an tam avangin, Supply Reduction chauh ni lo, Demand Reduction ah pawh hma kan la dawn a, Awareness pawh kan ti nasa ang,” a ti a ni.