Tuikum bialtu MLA in Sialhau ah puantahtute a kawm

Tuikum bialtu MLA leh Assembly Deputy Speaker Er. Lalrinawma chuan nimin khan a bial chhunga Sialhau khua tlawhin Buanhmun Handloom Cluster hnuaia puantah-a eizawn tumte nen inkawmna an nei.
Sialhau VCP In-a heng puantahtute nen an inkawmna ah hian bialtu MLA chuan a a bial chhung tana MLA Fund a hmuh zaa 80 vel zet chu eizawnna lam hawi atan a hmang thin tih sawiin, “Thil dang ka ngaipawimawh lo nilovin eizawnna hi ka ngaipawimawh zual bik vang a ni,” a ti a. An bial chhung khaw hrang hrangte dinhmun thlir kual chungin theihtawpin an umzui thin thu sawin, “Khumtung ah chuan Balhla chin kan uar avangin Link Road kan ngaipawimawh a, Chhuanthar lamah chuan Furniture lam kan uar thung a, chutiang zelin khaw hrang hrangte mamawh a inang vek lo. Sialhau khaw tan hian Puantah a eizawnna hi a tha ber dawn niin ka hria a, tihian hma ka la zui ta a ni,” tiin MLA Fund a hman dan tlangpui leh Sialhau tana Buanhmun Handloom Cluster a kalpui chhan a sawifiah a ni.

Buanhmun Handloom Cluster hnuaiah hian chhungkaw 31 velin bul an tan dawn tih pawh bialtu MLA chuan sawiin, eizawnna tha taka a chan zui zel theih nan anmahni ah thil thui tak a innghat chho dawn tih a sawi a. An khua chu Zoram in puantah-ah an hriatzui ngei a beisei dawn tih sawiin, “Sawrkarin bul a tanpui ang che u a, a hlawh-tlinna chu nangmahni ah a inghat a ni,” a ti.

Sialhau khua ah hian Bialtu MLA hmalakna hian puan bânna leh a thilna hmun tur RCC building tha tak an khaw chhungah sak a ni tawh a. Nimin-a inkawmna ah hian zawhna leh chhanna hun hmangin he hun hi Sialhau VCP PC. Lalduh-sanga chuan a kaihruai a ni.