Family Oriented SEDP hawnna Chief Minister in neiin Department te hnenah Cheque hlan nghal an ni

Mizoram Sawrkar Flagship Programme – Socio Economic Development Policy (SEDP) hnuaia mimal chhungkua hmasawnna leh an eizawnna tinzawna eizawnna ngelghet an neihna tur, Family Oriented SEDP hawnna chu nimin khan Aizawl Vanapa Hallah neih niin Chief Minister Zoramthanga chuan he hun hi a hmanpui a ni.

Family Oriented SEDP hawnna hun nimina neih ah hian SEDP Governing Board Chairman leh Chief Minister Zoramthanga chuan hripui in Mizoram tiamin khawvel pum kum hnih chhung a tihbuai leh a tuam avangin SEDP pawh hi a pangngai anga kal chhohpui a harsa chungin Sawrkar chuan SEDP hi kan sum dinhmun ngaihtuah chungin a theih ang angin kan tlin chin angin kalpui an rel thu a sawi a. Sum leh pai dinhmunin a zir loh avangin a tira SEDP duan angin leh duhthusam anga kalpui chu a theih dawn lo tih sawiin, amaherawhchu engemaw zat chu Sawrkarin a ti thei dawn tih a sawi a. “Chumi bultan nan Mizoram pumah tun Sawrkar kum chungin chhungkaw 60,000 chu a target a, Rs. 50,000/ theuh pek a ni dawn a, hei hi a kum khatna atana kan bultanna a nih tih hi kan hriat a ngai a. Hei hi a tawpna a ni lova, SEDP in a target kha chu chhungkaw tin tan nuai 3 a la ni a, ala kal zel dawn a ni,” a ti. Chief Minister chuan Sawrkar sum dinhmun a that lehzual hunah SEDP in chhungkaw tin tana target chu tihhlawhtlin ngei a beisei thu a sawi a. Politicsah chuan inbeihna te, insawiselna te chu a awm lo thei lo tih sawiin, heng insawiselna te hi democracy tithianghlimtu a nih thu a sawi a. Covid hripui avangin Sawrkarin sum a dawn tur a dawn tak loh, a hloh chu cheng vbc. 3000 vel a nih thu tarlangin, Sawrkarin kum 20222023 chhungin Family Oriented SEDP atana cheng vbc. 300 dah anih thu a sawi bawk. He hunah hian Chief Minister hian 1st Instalment atana beneficiary tin te pek tur sum chu a hlawmin Line Department 9 te hnenah a cheque in a hlan a ni.

He hun kaihruaitu Deputy Chief Minister leh SEDP Governing Board Vice Chairman Tawnluia chuan SEDP duanchhuah dan te, SEDP thil tum te, SEDP kalpui nana ruahmanna hrang hrang siamte leh an kenkawh dan turte sawiin, SEDP chu Mizoram chakna leh theihna te zirchianga, mipui ngaihtuah leh sukthlek te mil a duan a nih thu a sawi a, Mizoram intodelhna leh hmasawnna tura atan rahbi pawimawh tak a nih thu sawiin, District 11a SEDP kalpuina tana DC te tana sum ruahman cheque in a hlan bawk a ni.

Family Oriented SocioEconomic Development Policy (SEDP) in a tum bulpui ber chu mahnia eizawnna (Self Employment leh kut hnathawh) bultanna atan leh chutiang eizawnna kalpui mek ten hma an sawn zel nana an hman tur tanpuina pek leh Mizoram chhunga mimal leh chhungkua, a tam thei ang ber dinhmun tha zawka hlankai a ni. 

‘Family Oriented’ a nih angin tanpuina hi chhungkua anga dawn tur a ni a, chhungkaw pakhat atangin beneficiary pakhat chauh pek a ni dawn a, Department 9 huaiah Trade hrang hrang 70 chuang thlan tur a awm a ni.

Family Oriented thawh khatna (PhaseI) ah hian chhungkaw 60,000 huam turin MLA bial tinah chhungkaw 1500 theuh thlan an ni a, Line Department te kaltlangin thawh hnih in semchhuah tur a ni.

Comments

Popular News (Last 30 Days)

Serchhip DCSO sawn a ni