Mizoram Police-in Mizoram Home Guards & Civil Defence hnenah silai leh a mu thahnem tak an hlan

Mizoram Police chuan Mizoram Home Guards & Civil Defence (MRHG&CD) hnenah Silai leh a mu thahnem tak nimin khan an hlan.

Silai leh a mu inhlanna inkhawm hi nimin khan GS Arya Mess, PHG, Aizawl-ah neih niin Home Minister Lalchamliana chuan a telpui a, he hunah hian SLR (Self-Loading Rifle) 200 leh INSAS (Indian Small Arms System) 100, a vaiin 300 an hlan a, Silai pakhat hian Magazine 4 (magazine pakhatah hian silai mu 20 zel awm) a chhawm tel theuh a, he hunah hian Home Minister hriatpuina in Inhlanna Certificate ziah niin Mizoram Police aiawhin John Neihlaia IPS, IGP (Hqrs) chuan hming a ziak a, Mizoram Home Guards & Civil Defence (MRHG&CD) aiawhin Maj. Zosangliana Hualngo, Commandant General-cum-Director, MRHG&CD in hming a ziak bawk a ni.

Silai leh a Mu inhlanna hunah hian Home Minister Lalchamliana chuan Mizoram Police in MRHG&CD hnena silai an hman lai reng, la tha tak tak an pe chu thil lawmawm tak leh chhinchhiahtlak tak a ni tih sawiin, hun engemawchen atang tawh khan MRHG&CD hnena silai hlan hi a tul tihna a awm tawh a, amaherawhchu sawrkar kalphung dan leh hrai zawm a ngaih thin avangin an beisei aiin hun a duh rei tih a sawi a. An hman lai aia tha zawk silai an neih chuan MRHG&CD te pawhin inrintawkna, phurna leh thathona a pek ngei a beisei thu a sawi bawk. Home Minister chuan kan phak tawkah ralthuam leh hmanraw tha kan neih a pawimawh thu pawh sawiin, “Mizoram Police pawh hian silai leh ralthuam a tha thei ang ber nei se tih hi ka duhthusam a ni a, a theih chin chinah hma kan la zel bawk a ni,” a ti a. MRHG-ah hian a ngheta thawk 200 an awm tling lova, Volunteers te nen 1000 bawr vel an awm tih pawh sawiin, India ram State tinah an dinhmun hian duhthu a la sam loh thu leh tunah pawh hian MRHG volunteers tur lak belh an dil mek thu a sawi a. Civil Defence lam tihchak tumin MRHG Directorate-in hma a lak mek thu leh reilote ah Mizoram chhung hmun hrang hrangah phuisui zawka din theih beisei a nih thu te a sawi bawk a ni.

Silai leh a mu inhlanna inkhawm hi John Neihlaia IPS, IGP (Hqrs) chuan kaihruaiin MRHG&CD-a Commandant General-cum-Director Maj. Zosangliana Hualngo chuan Silai an mamawhna leh a tul zia an hriatthiampui avangin Home Minister leh Mizoram Police chungah lawmthu a sawi a. Tuna silai an hman lai mek .303 Rifle leh Sten Gun te chu Mizoram Police ten an lo pek tawh tho a nih thu leh a hlui deuh tawh avanga silai tha zawk an mamawhna a nasat lai taka hetianga pek an ni ta chuan MRHG&CD te pawh inrintawkna a pek belh bakah, tun aia tha leh awmze nei zawka an duty theih phah a beisei thu a sawi bawk.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man