MSACS hnuaia thawk ten lungawiloh an lantir

Rampum huapa AIDS Control hnathawktute chuan an hlawh bi siamthat chungchanga lungawilohna nimin khan an lantir.
Mizoram State AIDS Control Society (MSACS) hnuaia Serchhip District-a thawktute hnen atanga thu kan dawn danin NACO hnuaia State AIDS Control Society-ah hian rampumah District Hospital, CHC leh PHC bakah Medical College-a thawktu mi 25,000 vel an awm a, October 2013 khan an hlawh te chu ennawna siamthat a lo ni tawh nia sawiin, an hlawh hi siamthat sak leh tura nawr reng hnuah kum 8 hnu, August 3, 2022 khan NACO chuan hlawh bi thar a siam sak leh ta tih an sawi a. “He kan hlawhbi thar hi tunlai ni tin mamawh chakkhai man pung zel nen a beitham em em a, kum 5 aia rei lo thawk thawhte ngaihsak an ni miah lova. HIV/AIDS lama thawktu sang chuang chu kum lamah hna dang zawng thei ni tawh lo khawpin kum 18 chuang he hna rinawm taka lo thawk ngar ngar tawhte an ni. Heng tawnhriat nei ngah zawk thawktute ngaihsak miah lova NACO in hlawh bi a siam hi kan ngaihdan a ni lo em em a ni,” an ti.

Hemi chungchangah hian rampum huap AIDS Control hnathawktute chuan nimin, Aug. 22, 2022 khan lungawilohna lantirin Pisa kai chungin hna an thawk lova, he nawrhna hi Serchhip a MSACS hnuaia thawk te pawhin zawmin, nimin chawhnu lam khan lungawiloh lantirna hun an Pisa-ah neiin an thilphut hrang hrangte an tarlang bawk a ni.

Comments

Popular News (Last 30 Days)

Serchhip DCSO sawn a ni