Latest News

Sawrkar-in phalna a pek te hnenah Mizoram thar Grape atanga Wine siam leh hralh a remti

Mizoram sawrkar Council of Ministers nimin-a thukhawm chuan Sawrkar-in phalna a pek te hnenah Mizoram thar Grape atanga Wine siam leh hralh a remti.

Council of Ministers hi nimin khan Chief Minister Zoramthanga hovin Chief Minister Office Conference Hall-ah an thukhawm a, thu ngaihtuah tura chhawpchhuah hrang hrang zingah ‘The Mizoram Liquor (Prohibition) Draft Rules, 2022’ chu pawm niin, he dan hnuaiah hian Zu zawrh khapna chu khawng taka kalpui zel tur a ni a, hetihrual hian Mizoram-a kuthnathawktute Grape thar atangin Sawrkar in phalna a pekte tan Wine siam leh hralh a phalsak dawn a ni. Hemi chungchang zawhna chhangin Excise & Narcotic Minister Dr. K. Beichhua chuan, MLP Rules-ah hian Wine siam theihte chu Sacramenttal Wine leh ruihna atana hman tur ni lo, Beverage ti-a tarlan kher a ni tih a sawi a, Mizoram thar Grape atanga Wine siam leh hralh phal a ni dawn ta hian kuthnathawktute tan kawl a ti eng dawn a ni, a ti bawk.

Nimin-a Council of Ministers thukhawm hian Samagra Shiksha hnuaia zirtirtu mi 5000 dawn hun rei tak hlawh pung miah lo a an thawk chu an dinhmun siamthat sak nan DA zaa 15 leh Medical Allowance bakah an thawh rei dan a zirin allowance pek an remti a. Department hrang hranga Contract-a thawkte DA zaa 10 pek te, infiammi, ram chhung leh ram pawn inelnaa hlawhtlinna changte tana Mizoram Sports Incentive Cash Award Scheme 2022 chu pawm a ni a. Ramri luhka-a Immigration Check Post pathum- Zokhawthar, Kawrpuichhuah leh Zorinpui Immigration Check Post-a duty turin Mizoram Police post 20 siam belh remtih a ni a, Home Department hnuaia Head Constable (Operator) post 34 chu MPRO, Mizoram Police hnuaia Assistant Sub-Inspector (Operator) a hlankai te, sawrkar laipuiin District Rural Development Agencies (DRDA) titawp tura thu a chhuah avangin District tina DRDA te chu District Rural Development Office (DRDO)-ah leh a, Project Director 11 te chu MCS-a lakluh an rem tih bakah Planning & Programme Implementation Department-in Startup Mission Government Society din an rawtna te pawm a ni bawk a. Heng bakah hian Health & Family Welfare Department, Home Department, Finance, Revenue, UD&PA leh FCS&CA Department atanga rawtna lut te pawh pawm a ni.

Comments

Popular News (Last 30 Days)