Serchhipah ni 2 awh Pa khawi dan leh hralh tura sawngbawl dan zirhona neih a ni
Food Myco Lab, Serchhip P&E Venga he training neih kharna hun hi nimin chawhma dar 11:00 khan neih niin he hun hi Foods Myco Lab, Mizoram Founder leh 2021 MSMEa Young Entrepreneur Success Stories Achiever, Henry Saingura chuan a kaihruai a, he hun hmanpuitu FOCUS Serchhip Districta Project Manager K. Laltlanmawia chuan Serchhipah Foods Myco Lab. tha leh changtlung tak kalpui a ni ta chu lawmawm a tih thu sawiin, a neitu ten Bank loan te laa bul an lo tan tawh dan te a sawi bakah IFAD hnuaia Project, FOCUS atang pawhin a theih ang anga chhawmdawl dan an ngaihtuah thu a sawi a. Nu leh pa ten kan fa te lehkha kan zirtir in sawrkar hna thawk se kan duh thu leh amaherawh chu sawrkar hna in min daih vek dawn loh avangin thiamthil dang kan neih a pawimawh thu a sawi a. Foods Myco Lab. a Pa khawi leh hralh dan zirtu zawng zawngte chuan eizawnna tlaka an zirchhuah ngei a duhsak thu a sawi bawk.
FOCUS Serchhip Districta Project Manager chuan IFED hnuaia Project, FOCUS chu Mizoram District 6ah kalpui mek a ni tih sawiin, heng District 6ah hian chhungkaw 64,500 te tuam tura ruahman a nih thu te, kum 2018 atanga 2024 thleng FOCUS hi kalpui tura ruahman a nih thu leh hemi chhung hian heng chhungkua, kuthnathawk te hi an hnathawh atanga an sum lakluh tihpun bakah sik leh sa danglam mil zela an thlai chin leh ranvulh te thlak danglama nunkhawchhuah dan dap chu an hmalakna a nih thu a sawi a. Hemi ang hian heng chhungkua te hi FIGah insiamin kawng hrang hranga hmalakna kalpui mek a ni tih a sawi a. Ruahman lawk anga kum 2024 thleng kalpui tura ruahman chu he Project kalpui a nih tirh, kum 2018 leh 2019ah te inthlanpui neih avanga MCC puan a nih avanga chak taka kalpui theih a nih loh thu leh hri leng avanga hmalak a harsat zui thu te sawiin, tunah hian kum 2 vel chauh a awm tawh chungin sum hman tur atanga zaa 30 pawh an la hman phak loh thu te pawh a sawi bawk a ni.
He Training hi Ministry of Skill Devlopment & Entrepreneurship Govt. of India atangin Vikas Walke lehMzSRLM atangin Dennis Vanlalhlimpuia ten an hmanpui a, trainingah hian Serchhip District khaw hrang hrang atangin mi 34 telin nimina training kharna hunah hian Henry Saingura chuan Serchhip chu Paa kan intodelh theihna tura an hmalakna te sawi langin Mizo thalai lehkahthiam zawkten AgriFood Business lama kan ram a intodelh theih nan theihtawpa hmalak an tum thu a sawi a. He hunah hian Pa khawi tura hmalak dan tur te, Pa khawi tura sawngbawl dan leh a khawi dan te leh Micro Agri enterprise bultan dan te zirho niin a taka tih chhin nghal a ni.
Comments
Post a Comment