Infiamna huang hrang hrangah theihtawp chhuaha beitute tan eizawn theihna a awm - Er. Lalrinawma MLA

Assembly Deputy Speaker leh Tuikum bialtu MLA Er. Lalrinawma chuan infiamna huang hrang hrang ah eizawn theihna a awm tawh avangin theihtawp chhuaha beitute tan chuan kawng zau takin a inhawng tawh tih sawiin, thalaite pawhin nunkawng thalo laka inthiarfihlim zel nan te hmang se a duh thu a sawi bawk.

Chhiahtlang Football Association in Malsawm Suzuki bultuma Malsawm Suzuki Cup Football Tournament an buatsaih kharna Inkhawm Inrinni-a Chhiahtlang-a neih a hmanpuina ah he thu hi sawiin bialtu MLA Er. Lalrinawma chuan hun rei tak Chhiahtlang khawtlang in khelmual tha neih tuma an beih thu leh khelmual thar-ah ngei Football Tournament duhawm tak buatsaih a lo ni thei ta chu lawmawm a tih thu a sawi a. Infiammite tana hmunhma tha buatsaih sak zel chu sawrkar thiltum lian tak pakhat a ni tih sawiin, “Kan thalaiten infiamna ngaihlu deuh deuh se, taksa leh rilru hrisel zawk neiin, nunkawng thalo laka inthiarfihlim zel nan te hmang se kan duh a ni,” a ti. Deputy Speaker chuan infiamna huang hrang hrangah eizawn theihna a awm tawh avangin theihtawp chhuaha beitute tan chuan kawng zau takin a inhawng tawh tih pawh sawiin, “Thalaite hmalam hun hi a eng hle ni tih te i hrereng ang u,” a ti bawk.


He Tournament kharna inkhawm hi Chhiahtlang Football Association Vice President Lalremruatkima Colney chuan kaihruaiin Chhiahtlang Football Association President C. Laltlankima chuan lawmthu a sawi bawk a ni.

Chhiahtlang Chanmari Veng-a Field laih thar-a khelh Malsawm Suzuki Cup-ah hian Chhiahtlang-a Football Club 6 telin Inrinni-a Final khelh ah Kawn Veng FC leh Chanmari FC te inhmachhawnin Kawn Veng FC te hi si thum fai-a chakin an champion a, Champion Team te hian Trophy leh Medal bakah Rs. 10,000/- dawngin pahnihna hian Trophy leh Medal bakah Rs. 6000/- an dawng bawk.


Mimal chawimawina ah Laltlanhlua (Chanmari FC) chu Best Player atan thlan niin Lalruat-mawia (Kawn Veng FC) chu Best Keeper atan thlan a ni bawk a, match 7-a goal 14 khungtu Lalhlimawma Vangchhia (Kawn Veng FC) chu Top Scorer a ni bawk.

Comments

Popular posts from this blog

Tukverh-a tlasual boral