Lawngtlai-ah Family Oriented SEDP hawn a ni

Nimin khan Lawngtlai District tana Family Oriented SEDP hawnna neih niin Agriculture Development Board Vice Chairman H. Biakzaua MLA chuan a hmanpui a ni.

CYLA Hall Lawngtlai-a Family Oriented SEDP hawnna hunah hian H. Biakzaua chuan Family Oriented SEDP chu a tira ruahman angin a tahtawla kalpui chhoh zel tum a ni tih sawiin, Family Oriented SEDP chu Mizoram pumah beneficiary mi 60,000 hnenah 1st instalment pechhuak phawt tura ruahman a nih thu a sawi bawk.

Lawngtlai District-ah hian Assembly Constituency pathum - Tuichawng, Lawngtlai West leh Lawngtlai East te awmin, Tuichawng bial-ah khaw 88, Lawngtlai West bial-ah khaw 32 leh Lawngtlai East bial-ah khaw 67, a vaiin Lawngtlai District chhungah khaw 187 a awm a, bial tinah beneficiary 1500 zel awmin a vaiin beneficiary 4,500 an awm dawn a ni. AH&Vett Department hnuaiah beneficiary 1,909; Agriculture Department hnuaiah 1,640; Commerce & Industries Department-ah 329; Land Resources, Soil & Water Conservation Department -ah 282; Horticulture Department -ah 180; Fisheries Department-ah 79; Urban Development & Poverty Alleviation Department-ah 58 leh Sericulture Department-ah 23 an awm a ni.