Serchhip District-a Vaccine vawnthat dan leh mipuite hnena pekchhuah thin dan enfiah a ni

National Immunization Schedule (NIS) hnuaia raipuar leh naupang te hnena Vaccine pek thin leh pek dan a dik leh dikloh enfiahna Effective Vaccine Managment Assessment (EVMA) chu Mizoram-ah a vawi khatna atan neih niin Serchhip District chu nimin khan rawn enfiah a ni.
3rd National EVMA-ah hian a vawi khatna atan Mizoram rawn enfiah niin nimin khan Assessment nei tura ruat Dr. Zinia T. Nujum (Addl. Professor, Community Medicine, Govt. Medical College Kollam, Kerala) leh Dr. Reshma M (State Immunization Consultant, Assam) te chuan Serchhip District an rawn tlawh a, Serchhip District hnuaiah hian District Vaccine Store (DVS), Serchhip leh Thenzawl Cold Chain Point (CCP) te chu an rawn endik a, nizan khan Serchhip ah riakin Vawiin lam hian Champhai District an pan leh dawn a ni.


Effective Vaccine Managment Assessment (EVMA)-ah hian National Immunization Schedule (NIS) hnuaia naupang leh raipuar te hnena Vaccine pek thin te a dahthatna (storage) te a him leh him loh te, Vaccine pek dawna phurh kual dan a dik leh dik loh te enfiah thin a ni a, Vaccine dahthatna hrang hrang- Ice Lined Refrigerator te, Deep Freezer, Cold box, Vaccine Carrier leh Vaccine Stock an neih zat leh mipui-a pek dawna chatlak a awm leh awm loh te enfiah a ni a. Vaccine dahthatna (Storage)-a him loh-a Temperature dik lo ah Vaccine te dah anih chuan Vaccine naupang leh raipuar te hnenah Vaccine pechhuak reng mah se a thawh dan tur angin a thawk thei thin lo tih Health Department hotute chuan sawiin, natna lakah min ven theih dawn loh vangin uluk taka vawn thin a ni tih an sawi a ni.

Sawrkar laipui tirha rawn kal heng Central Team te hian nimin khan Thenzawl-a Cold Chain Point (CCP) an tlawh hnuah nimin chawhnu lam khan Serchhip-a District Vaccine Store (DVS) hi an tlawh leh a, nizan khan Serchhip-ah riakin Vawiin chawhma lam hian Serchhip-a an enfiah turte an enchhunzawm leh anga, chawhnu lamah Serchhip chhuahsanin Champhai an pan anga, Champhai DVS leh Bungzung CCP te an tlawh leh dawn a ni.

Comments

Popular posts from this blog

Tukverh-a tlasual boral