District 5-a DC te Vairengte-ah an inkawm

Assam leh Mizoram-a ramri-in a tantlang District panga (5)-a Deputy Commissioner te chuan nimin khan Vairengte-ah inkawmna neiin heng District-a Superintendent of Police, Divisional Forest Office leh SDO(S) te an tel bawk a ni.

225 CRPF Camp, Vairengte-a he thutkhawm ah hian Kolasib, Mamit, Cachar, Karimganj leh Hailakandi District thuneitute telin Kolasib District Bawrhsap John LT. Sanga chuan kalkhawmte lawmna thu sawiin, State pahnih inkar ramri buaina chinfel a nih theih nan leh boruak muanawm a awm theih nana Assam leh Mizoram Home Minister-ten thla 2 chhung a vawikhat thutkhawmna nei tura tih a nih thu a sawi a. He thutkhawmna kaltlang hian mahni District-a harsatna awmte sawihona hun tha tak neih leh thawhhona tha tak hnuaia chinfel thin beisei a nih thu a sawi bawk.

He thutkhawm ah hian Mizoram leh Assam lam a Police duty-te inkar a inpawhna tha a awm theih nana hmalak dan tur sawi a ni a, ramri hnaih a chengten an huan, lo, ram tha taka an enkawl chhunzawm theih dan tur sawi a ni bawk. State pahnih inrina bawr vel a ramngaw awmte humhalh kawng a thawhho dan tur leh ramri kan-a dan phal loh ramsa tawlhrukna awm thin ven dan tur te sawi a ni a. Ramri-a Police duty-na hmun thawmthat hna hrang hrang kalpui a nih rualin heng duty-na hmun kaltlanga hmalakna awm lo tur a ruahmanna siam a tul thu sawi a ni. 

Heng bakah hian Mamit District-a kuhva chingtuten an kuhva rah hralhna kawngah Assam lamah harsatna an tawh thin thu sawilan a ni a, Mizoram chhunga kuhva hring tharchhuah te chu harsatna awm lova hralh a nih theih nan hmalak dan tur sawi niin Thinghlun khaw bul a Tlawngte lui a Lei dawh hna leh Zophai, Bairabi-a Lei dawh hna chhunzawm dan tur sawiho a ni a, harsatna lian zual awmte chu chinfel a nih theih nan hotu lian zawkte hnen a thlen tur a rel a ni bawk.