Sawrkar hnathawk mi 21 eiruk thubuai siamsak tawh

Kum 2018 atanga kumin 2022 chhungin Mizoram-ah sawrkar hnathawk eiruk thubuai siamsak mi 21 an awm tawh a, thiamloh chantir (convict) tawh mi 14 an awm bawk.

RTI hmanga Zalen  zawhna Mizoram sawrkara Vigilance Department SPIO-in a chhanna atanga a lan danin sawrkar hnathawk eiruk thubuaia thiamloh chantirte chu lung In tan leh pawisa chawitira hrem an ni a, hremna pekte lung In an luh ngei leh ngei loh erawh Court lam chan a ni.

Vigilance Department-in eiruk leh a kaihhnawih thubuai a chhui dan tlangpuiah chuan ACB-in complaint/FIR a dawn chu Chief Vigilance Officer phalna la hmasain Preliminary Enquiry (PE) Register thin a ni a, PE Report chu Chief Vigilance Officer hnenah thehlutin Regular Case kaltlangpui chi nge a niha thubuai bawhzui tlak loh tih leh Disciplinary Proceedings draw-na chi tih report a zirin Chief Vigilance Officer thutlukna in kaltlangpui thin a ni.

Kum 2018 chhung khan sawrkar hnathawk eiruk thubuai chungchang ah Preliminary Enquiry (PE) paruk (6) a awm a, Regular Case pasarih (7) ziahluh a ni a. Kum 2019-ah Preliminary Enquiry 13 leh Regular Case ziahluh pahnih a awm bawk. Kum 2020-ah Preliminary Enquiry pariat (8) a awm laiin, Regular Case ziahluh a awm lo thung a, kum 2021-ah Preliminary Enquiry 10 leh Regular Case ziahluh pali a awm a. Kum kal mekah PE panga (5) leh Regular Case ziahluh pariat (8) a awm bawk.

Kum 2021-a Vigilance Department SPIO in RTI zawhna a lo chhan danin, kum 2013-18 chhung khan eiruk leh a kaihhnawih thubuai PE 86 leh Regular case 39 a lo awm tawh a, chung atang chuan hremna pek mi panga awmin, chung mite chu hrehawm taka lung In (kum 1-4) tang tur leh pawisa Rs. 10,000 - 50,000 chawitir an ni.