Serchhip District-ah AH&Vety Department in ‘Family Oriented SEDP’ beneficiary an ngah ber

Serchhip District chhunga Assembly Bial pathum atangin ‘Family Oriented SEDP’ dawng tur mi 4499 te thlanfel an ni tawh a, Line Departmenty 9 zingah AH&Vety Department chu Beneficiary ngah ber an nih laiin Tourism Department hnuaia Trade thlang erawh an awm lo nia hriat a ni.

Serchhip District tana ‘Family Oriented SEDP’ tlangzarhna hun naktuk, August 31, 2022-a nei tura inbuatsaihna kalpui mekah Line Department te chuan an Department hnuaia Trade thlangtu awm zat hi Aizawl lam atanga an dawn fel tawh thu an sawi a, thudawn danin SEDP dilna hi Village Level Committee-a thehluh a nih hnuah District Level Committee chuan State Level pawmpui turin an thawn leh a. Heta tang hian Beneficiary List hi rawn tihchhuah leh niin hei vang hian Department thenkhat te chuan nimin thleng khan an Department hnuaia Beneficiary te enfiah hna hi an la thawk mek a ni.

Tarlan tawh angin ‘Family Oriented SEDP’ hnuaiah hian Assembly bial tinah mi 1500 zel thlan tur niin hemi ang hian Serchhip District-ah mi 4500 thlan tur ni mah se Chekawn khua in pakhat an thlan kim loh avangin mi 4499 thlanchhuah an ni ta a. Line Department 9 zinga 8 te hian Serchhip-ah Office neiin nimin khan LENKAWL chuan heng Office hrang hrangte hi biain an Department hnuaia Beneficiary dinhmun zawhfiah an ni a, Department mal-ah AH&Vety Department chu Beneficiary ngah ber niin 1746 zet an awm a, hei hi Beneficiary pumpui atanga chhutin za zela 38.80 a ni a, AH&Vety Department hnuaiah hian Trade thlan tur panga (5) awmin Vawk vulh thlangtu mi 1012 zet an awm bawk a ni.

Commerce and Industry Department hnuaiah Trade thlan tur tam berin Trade 23 a awm bakah Trade thenkhat hnuaiah Trade hrang hrang siam te awmin an Department hnuaiah hian Beneficiary 937 zet an awm bawk a, Agriculture Department hnuaiah Trade 4 awmin beneficiary 896 an awm bawk. Horticulture Department hnuaiah Trade hlawm 7 awmin Trade hlawm thenkhat hnuaiah hian hmalakna hrang hrang awmin beneficiary 697 an nei bawk a. Fisheries Department hnuaiah Trade pakhat chauh a awm chungin thlangtu mi 111 lai an awm a, UD&PA Department hnuaiah Trade 4 awmin beneficiary 50 an awm a. Land Resources, Soil & Water Conservation Department hnuaiah Trade thlan theih 4 awmin beneficiary 42 an awm a, Sericulture Department hnuaiah Trade thlan theih 3 awmin beneficiary 20 an awm bawk a ni.

Hetihlai hian Tourism Department hnuaia Trade thlan theih pakhat, Tourism-Tourist Guide/Tour Operator chu Serchhip District-ah thlang an awm lo nia hriat a ni a, Serchhip-ah hian Tourism Department hian Office dawr tur an nei mumal lo bawk a ni.