September 1, 2022 atangin Mizoram-ah Central Motor Vehicles (Amendment) Act 2019 hmang dawn

Attorney General, Supreme Court-in thupek a lo chhuah tawh angin Mizoram-ah pawh September 1, 2022 atangin Mizoram-ah Motor Vehicles (Amendment) Act, 2019 chu hman tan a ni ve dawn tih Transport Secretary KT. Beicho chuan a puang.
Transport Secretary hian nimin khan Aizawl-a an Department Conference Hall-ah thuthar thehdarhtute kawmin, Central Motor Vehicles (Amendment) Act 2019 hi September 1, 2019 atanga hman tan turin Gazette Notification chu August 28 leh 30, 2019-ah a chhuah thu sawiin, “Hei hi State zawng zawng hmang ngei tura min nawrna avangin kan State pawhin September 1, 2022 atanga hman tan turin Notification chhuah a ni,” a ti a. Central Motor Vehicles (Amendment) Act 2019 hnuaia pawisa chawi turte a san em avangin Transport Department Minister duhdan anga tihhniam tuma hma an lak thu sawiin KT. Beicho chuan, “Kan State mai ni loin State dang pawhin an buapui nasa a, pawisa chawi tur tihniam zawngin notification-te an chhuah a ni,” a ti a, hetiang a nih avang hian Central lam pawhin Attorery General ngaihdan an lak thu a sawi.
Transport Secretary sawi danin, Attorney General chuan 'Motor Vehicles (Amendment) Act, 2019 hi Parliament Legislation a nih avangin State sawrkarin hemi zulzui hian dan hranpa emaw, pawisa chawi tur a tihniam thiang lo a. Central sawrkarin ti tura a tih, State-in a lo ti lo a nih chuan Article 356 of the Constitution of India hi State sawrkar chungah lekkawh theih a ni,' tiin a chhang a. Transport Minister duhdan angin he Amendment Act hi zirchiang turin Law & Judicial Department-ah thawn niin, “Law & Judicial Department lam chuan Attorney General duhdan anga kal turin min rawn hriattir a ni,” a ti.
KT. Beicho chuan Transport Department VAHAN.40 leh SARATHI 4.0 software a hman mek thu sawiin, VAHAN.40 leh SARATHI 4.0 hi Motor Vehciles (Amendment) Act, 2019 mila an siam danglam vek tawh thu a sawi a. MoRTH chuan state tinte E-Challan kalpui tura a tih thu sawiin, E-Challan hman a nih chuan dan bawhchhetu ten Office kal ngai lovin, hmun leh hmunah an duh chuan an chawi tur ang an chawi thei dawn tih a sawi bawk.

Comments

Popular News (Last 30 Days)

Serchhip DCSO sawn a ni