Vegetable Supply Chain hnuaia Serchhip-a thlai thar hralh dan sawrkar in a sawifiah

Mizoram sawrkar-a Horticulture Department chuan tunhnaia Vegetable Supply Chain hnuaia Serchhip thlai thar hralh a nih dan sawifiahin, “He Vegetable Supply Chain chungchang hi thil thar a nih avang leh inpuahchahna hman a awm loh avangin a thawktute pawhin duhthu sam lohna tam tak kan nei ang tih a hriat,” an ti.

Nimin a thuchhuah an siamah Horticulture Department chuan COVID-19 hripui avangin Ni 21 chhung Mizoram leh India ram pumah inkharkhipna, Lock Down kalpui mek a ni tih tarlangin, “Hemi chhung hian kuthnathawktu ten an thlai leh thei tharte hralhchhuah an mamawh a; chutihrualin khawpuiah mipuiin thei leh thlai an lei a ngai ve bawk a. Hemi hre reng hian Sawrkarin Vegetable Supply Chain a duang chhuak ta a ni,” an ti a. District tinah DC hova hma la tura tih a nih thu leh Aizawl District bikah chuan hemi atan hian Horticulture Department chu Nodal Department-ah dah niin, Commerce & Industries Department leh MIZOFED te nena thawk ho tura tih niin Kuthnatawktu ten an thlaithar rawn kente atangin sum an hmuh nghal zel a ngaih avangin leh tun dinhmunah kuthnathawktuten ei leh bar tur, nitin chakkhai leina an mamawh avangin an thlai thar rawn thawn ang ang hi man pek tlak zel an ngai tih an sawi a. Chuvangin MIZOFED chu an rawn ken ang apiang chu sumfai pe zel tura tih an ni tih an sawi bawk.

Horticulture Department chuan Committee in a rel angin March 28, 2020-ah thlai hrang hrang Trip 21 Aizawl-a lo thleng zingah Serchhip atangin Zikhlum, Bawkbawn leh Tomato telin, COVID-19 hripui len hmain Zikhlum hi wholesale-ah kg. khat chu Rs. 17 a pek thin niin, Retail a hralhna zat chu kg. khatah Rs. 50 bawr vel a ni a. Heti a nih avang hian Committee chuan kuthnathawktute hmakhua ngaiin Kg. ah Rs. 25 in a laksak tih sawiin, hemi atanga 15% a sangin Local Level Task Force (LLTF)-ah pek chhuah leh a nih thu leh LLTF te senso ngaihtuahin Kg. ah Rs. 40 aia to lova hralh tura tih an ni tih an tarlang a. Chutiang bawkin Bawkbawn pawh Kg. khatah Rs. 25 a laksak an ni a, hei hi 15% a sanga pek chhuah aih thu leh thlai dang chi hrang hrang chu kuthnathawktuten an rawn ken angin a man pek tlak vek a ni tih an tarlang a. A vawikhatna ah hian khawlum avang leh a tharchhuaktute pack/tuam dan in a zir loh avangin thlai a chhiat nasat thu leh a tawih nasat thu an sawi bawk.

Hei bakah hian March 31, 2020 a thlai thleng leh tur rate chu Meeting-a lo sawi lawk tawh angin Zikhlum Kg. khat Rs. 30-a lain LLTF hnenah Rs. 40-a pekchhuah tur leh Bawkbawn chu Rs. 25-a lak a, LLTF hnenah Rs. 35 a pek-chhuah tura rel a ni tih tarlangin, hei hian thlai tam tak tawihral tur a phuhru dawn tih an tarlang a. March 31 hian thlai trip 20 vel beisei a nih laiin District thum atangin trip 40 a luh thu leh thlai tam tak chu chhan hrang hrang avangin a chhe sa-a a thlen thu leh MIZOFED in Challan a thlai man zat thlai awm ang zelin a man alo pe vek niin an sawi.

An thuchhuah chuan March 31-a Zikhlum thleng te hi Kg. ah Rs. 30/- a lak niin Task Force te hnenah Rs. 40/- a pekchhuah leh a ni tih an tarlang a. “Thlai dang heng Mizo thlai - Phuihnam, Khanghu, etc. ah erawh chuan tel/Kg khat zelhah Rs. 10 hi buaipuina senso atan leh hralh tlak loh chhe nasa lutuk tlem azawng lo phuhruk nan tih a ni. Tun dinhmunah hian MIZOFED hian Rs. 3,00,000 (Cheng nuai thum) bawr vel a hloh mek a ni,” an ti bawk.

Horticulture Department chuan Sawrkar in kuthnathawktu ten thlai an hralh theihna tur leh mipuiin thlai eitur an neih theih nan theihtawp a chhuah zel tih sawiin, “He Vegetable Supply Chain chungchang hi thil thar a nih avang leh in puahchahna hman a awm loh avangin a thawktute pawhin duhthu sam lohna tam tak kan nei ang tih a hriat a. Hetiang dinhmun a awm kan nih avangin hemi hnuaia thawktu Department zawng zawng ten mipui hriatthiamna tak meuh a ngen a ni,” an ti bawk.