Karleh Thawhtanni atanga hman turin Sawrkar Pisa kai tur tih danglam hret a ni

Mizoram-a Lockdown kalpui a nih mek laiin Mizoram sawrkar chuan sawrkar Pisa hrang hranga kai turte chungchangah ruahmanna thar a siam.
Hemi chungchangah hian Mizoram Chief Secretary leh State Disaster Management Authority-a State Executive Committee Chairman ni bawk, Lalnunmawia Chuaungo chuan thuchhuah siamin April ni 16, 2020-a Lockdown chhunga sawrkar Pisa kai dan tur thupek awm tawh chu khawlaia mihring leh motor vei vak tihtlemna atan leh hnathawhna hmuna Social Distancing a awm theih nan bakah sawrkar pisa tih thawl nan a siam danglam a. Hemi ang hian Dan pangngai (full strength) a Pisa kai turte chu Health Services, Police, Home Guards & Civil Defense, Fire & Emergency Services, Disaster Management, Civil Aviation, Prisons, Excise & Narcotics, Municipal Services, Forest Field Works, PHE, P&E te niin heng tihloh Sawrkar pisa dang zawngah chuan Group B, C & D hnathawkte zawng zawng chu hmun thuma thena hmunkhat zelin an inkalchhawk tawh dawn a, hemi atan hian Secretaries, Heads of Departments leh Heads of Offices ten Office inkaichhawk dan tur ruahmanna siamin Thawhtanni atanga hman nghal turin order an ti chhuak nghal ang.
Pisa kai tur te'n Office Order copy (detailment order) leh an ID Card chu veivah phalna (movement permit) atan an hmang nghal thei ang a. Heng document te hi a tul huna Police leh Local Level Task Force duty te en turin an kawl reng tur a ni a. Hei hi tul lova Sawrkar hnathawk mahni duty loh ni a an vei vak tur venna atan a tih a ni a, sawrkar hnathawk nih avangin duh duh hunah a chhuah ngawt theihloh a ni.
Sawrkar Department-a Secretaries, Heads of Departments leh Heads of Offices ten a tul a nih chuan order dang chhuahin Group B, C & D hnathawkte hmun thuma thena hmunkhat aia tam Office kal turin an ruat thei thung dawn a. Staff zawng zawng ten an pisa kai loh ni-ah Mobile Phone an switch off tur a ni lova, biak theih leh In atanga Office hna tul apiang thawk turin an in ring reng tur a ni tih thuchhuah ah chuan tarlan a ni bawk.

Comments

Chhiar Hlawhte