mCOVID-19 Mobile Application tih changtlun zel a ni

Mipui nitin mamawh (Essential Commodities) ni lo bungraw dang Mizoram-a phurhluh phalna, Inter-State Movement Permit online-a dil theihna, mPASS chu Information & Communication Technology (ICT) Department chuan mCOVID-19 Mobile Application-ah an telh belh.

Hetianga mPass tih changtlun zel a nih avang hian niminpiah tlai khan Chief Secretary, Lalnunmawia Chuaungo hovin Sawrkar mi pawimawh leh Mizoram Truck Owners & Drivers Association, Mizoram Oil Tanker Driver Association leh Mizoram Tripper Driver Association aiawh ten Secretariat Conference Hall-ah an thlirho a. He hunah hian Chief Secretary chuan bungraw phurhluh chu thil tul tak a ni chungin fimkhur thei ang bera kalpui a pawimawhzia a sawi a. Mizoram chhunga chengte atang chuan COVID-19 darh hi a rinawm loh a, amaherawhchu bungraw phurluttu ten hmun dang atanga he hripui hi kaiin Mizoram-ah an pulut thei tih hriain fimkhur thei ang bera kalpui a ngai, a ti a, chumi atan chuan he mPASS hi thil tangkai tak a ni thei dawn a ni, a ti.

Bungraw phurtu pawl thenkhatin Mizoram chhung (District leh District inkar leh District chhung)-a bungraw phurh phalna dil kawngah harsatna an tawh dan an sawi pawh Chief Secretary chuan he App hmanga online-a dil theihna tur siam turin ICT Department hotute a hrilh a ni.

Information & Communication Technology Department in mPass an siam thar te hman dan leh hnathawh tlangpui chu hetiang hi a ni :

1.mPASS : Registration - He hi nitin mamawh bungrua Essential Commodities tana duan niin phalna (Permit) dilna a ni lova. Registration an tihfel hnuin mPASS ID hi a lo lang anga, SMS pawhin mPASS ID hi an dawng bawk ang. Driver/Handyman te khawi hmun atangin nge an lo kal, khawiah nge an pan dawn, bungrua engnge an phurh tih te hriat nan mai bakah Contact Tracing tih a ngaih palhin an chanchin chhui zui theih nana duan a ni.

2. mPASS : Permission – Hei hi phai atanga Non-Essential Commodities Mizoram-a phurhluh phalna, Inter State Movement Permit online a dil theihna a ni. Hetah hian chanchin kimchang fill-up in dilna thehluh tur a ni anga. Dilna te hi Approving Authority lamin an enfiah hnuin phalna hi SMS in a diltute an thawn ang. SMS-ah hian mPASS ID a tel bawk ang.

3. mPASS : Declaration – Hei hi bungraw phurh chanchin kimchang thehluhna niin Non-Essential Commodities phurh dilnaa information kimlo te an chhu lut tha leh thei anga. Permission dil laia Driver/Handyman/Motor leh a dang fill up loh te hi hriat theih veleh Mizoram an lo luh hma ngeiin mPASS:Declaration atangin an thehlut ngei ngei tur a ni.

Non Essential Commodities phur ten mPASS : Declaration hi an tih ngei ngei a ngai anga. Essential Commodities phur ten mPASS : Registration ah an bungraw phurh an declare tawh chuan mPASS : Declaration hi an tih kher a ngai tawh lo ang. Checkgate-a duty te hnenah kalin mPASS ID hi an hmuh tur a ni.

4. mPASS : Entry Point Scan – Entry Point Scan hi Checkgate-a Medical Duty te hman tura siam niin anni hian Medical Screening an tih zawhah bungraw phurtute mPASS ID hi Portal-ah an chhinchhiah (thun lut) ve ang.

mCOVID-19 Mobile App hi Android system hmang te tan Playstore atangin a download theih a, iOS (Apple phone) system hmang te chuan mcovid-19.mizoram.gov.in ah kalin he app hi an hmang thei a ni. mPASS hman dan chungchang leh Inter-State Movement Permit dil dan video te hi MSeGS Ict Youtube channel ah en theih a dah a ni.

Inkharkhipna kalpui meka Revised Guidelines ang chuan State pawn atanga bungraw lakluh theih zingah nitin mamawh (essential commodities) te chu phalna hranpa lak ngai lovin lakluh theih a ni a. Amaherawh chu, SDO(C), Vairengte emaw SDC, Bairabi hnenah declaration (prescribed form hmangin) an thehlut ngei ngei tur a ni.

Nitin mamawh (essential commodities) ni lo, ei leh bar zawnna leh hmasawnna atana mamawh bungrua - Steel, Cement, Brick, Balu, In sakna bungrua ilo lalut turte erawh chuan hemi atana dilna form siam hmangin Home Department phalna an la hmasa tur a ni, tih a ni a. Heng te hi tunah chuan mahni kal lovin mPASS hmangin online-a dil theih tawh a ni. Mizoram chhunga thilsiam, vulh leh tharchhuah te chu Mizoram chhunga hmun hrang hrangah bungraw chet tanna tur district a Deputy Commissioner te phalna-in thawnchhuah theih a ni a. Heng phalna online-a dil theihna hi Mobile App hi Information & Communication Technology Department in an buaipui tan bawk a ni.