Serchhip-a Bungraw phurtu lirthei luh leh chhuah dan tur ruahmanna siam a ni

Serchhip District Deputy Commissioner, Dr. Lalzirmawia Chhangte chuan Serchhip khawpui chhunga bungraw phur lirthei luh leh chhuah dan tur chungchangah thupek a tichhuak thar.
He thupek tihchhuah ah hian April 22, 2020-a Serchhip Town Area huamchhunga Village Level Task Force (VLTF) te Deputy Commissioner, Serchhip hova meeting-in a rel angin, khaw chhunga bungraw phur motor luh leh chhuah dan turah ruahmanna hi siam a nih thu tarlangin, Essential leh Non-Essential Commodity phur lirthei, Serchhip khawpui chhunga dah tur zawng zawngte chu khawpui chhung lut lovin Kikawn-ah din phawt tur a ni tih a tarlang a. Mizoram sawrkar-a Home Department atanga phalna nei emaw, Vairengte leh Bairabi Duty point-a Self Declaration-a hming ziakte chauh Serchhip District-ah tlanluh phalsak an nih tur thu leh khawlaia mipui pungkhawm leh veivak an tam lohna turin bungraw phurh hi zan-ah chauh unload tur a nih thu leh bungraw phur Motor reng reng chhun-ah khawpui chhung luh phal a ni lo tih a tarlang a. Serchhip khawpui kaltlanga khaw dang/District danga bungraw dah turte erawh chu phalna nei an nih chuan dang khawtlai lovin tlang tir zel tur a nih thu leh khawpui chhungah an din khawmuan phal a ni lo tih a tarlang bawk.
Hei bakah hian Bawrhsap thupek chuan bungraw chahtu (dawr leh mimal) ten bungraw hlan thlakna tur Veng-a Village Level Task Force-te leh Police duty te hriatpuina chauhin zanah bungrua unload tur a nih thu te, bungraw phur motor khalhtu leh handyman-te hian bungraw unload an ti tur a nih loh thu leh, motor chhuahsan lovin bungraw unload chhung chu an nghak tur a ni tih a tarlang a, bungraw unload anih hnuah khawiahmah khawmuang lovin Driver leh Handyman te hi an let leh nghal tur niin Dawr neitu/bungraw chahtute pawhin motor atanga chhuk tira lo mikhual phal a nih loh thu leh khaw chhunga an awm chhungin midang nen inhlat thei ang berin an awm tur a ni tih a tarlang bawk a. Driver leh Handyman te hi kalkawngah pawh chawl khawmuang lova eirawng pawh anmahni inbawl mai tura beisei an nih thu leh mamawh an neih leh puih an tulna apiangah bungraw chahtute leh Village Level Task Force ten lo pui tura beisei an nih thu pawh a tarlang bawk.
Bawrhsap chuan Serchhip District atanga State pawna bungraw laa kalte reng reng (Essential or Non-Essential commodities pawh nise) Serchhip District an rawn luh leh hunah an chungte bula khawsak nghal a rem tawh dawn lo tih pawh tarlangin, sawrkarin a ruatsa Quarantine Facility-ah an khawsa tur a nih thu leh bungraw laa an kal leh duh anih chuan an kal leh phalsak an ni ang tih a tarlang a An kal hnuhnun ber atanga ni 14 chhung chu Quarantine Facility-ah hian an khawsak a ngai dawn tih a tarlang bawk.

Comments

Chhiar Hlawhte