MZP in CM hnenah an thlen

Mizo Zirlai Pawl General Hqrs. hruaitute chuan nimin khan Chief Minister, Zoramthanga chu a Pisa-ah kawmin rawtna hrang hrang an thlen.

Nimin a Chief Minister an kawmna ah hian MZP hruaitute chuan Inkharkhipna kalpui anih avanga Zirlaite leh School neituten School Fee (Monthly/Hostel Fee) chungchangah harsatna an tawh mek thu sawiin, he harsatna avanga School Fee 50% aia sanglo lak anih theih nan ruahmanna siama hmala turin rawtna thlen ani a. Chief Minister chua Zirlaite leh School neituten harsatna an tawh lohna turin sawrkarin a tul anga rua-hmanna siamin hma an lo lak tur thu leh chak zawka an lo bawhzui tur thu a lo hrilh a ni.

Mizoram pawna tangkhang mek, a bikin North East State pawna tangkhang, dinhmun harsa zualte chhawmdawlna sawrkarin awlsam zawka a pek theih nan Center remchang hmun hrang hrangah siam rawtna pawh MZP hian Chief Minister hnenah hian thlenin, Chief Minister hian a tul anga hmalak zel an tum thu alo hrilh a. Chakma Autonomous District Council huamchhungah Zohnahthlak Unauten thil lei chungchangah harsatna an tawk chu hriatthiam harsa an tih thu pawh thlenin, Chief Minister chuan hei hi pawi a tih thu leh harsatna an tawh chhunzawm loh nan hmalak a nih tur thu a lo sawi a ni.

Hei bakah hian Chief Minister chuan Tui Bill leh Electric Bill-ah mipui ten harsatna an tawhlohna atan Installment-a bill an pek theih nan hmalak a nih tur thu a sawi a. Kuthnathawktu ten an thlai tharchhuah phurkhawma rate mumal zawka hralhchhuah anih theih nan leh Cement leh Rod mamawhtuten an hman tur chak zawka lakluh anih theih nana hmala tura an ngenna bakah nitin inhlawhfa te hnathawhna tur hmanrua a awm theihna tura hma la tura an ngenna pawh chak zawka sawrkar in hmalak a tum thu Chief Minister hian a lo hrilh bawk a ni.