Vairengte-I VLTF ten Mizoram leh Assam ramri-a venhim hna thawktute kohchhuah an rel

Vairengte VC-I huamchhunga Village Level Task Force (VLTF) chuan Assam leh Mizoram inrina ramhnuai-a Task Force Duty te chu kohchhuah rih nise an ti a. Hetihlai hian Vairengte khawchhunga Village Level task Force dang te chuan ramri-a Duty an kalpui mek chu dan pangngai-a chhunzawm an la thum thung nia thudawn a ni.

Nimin chawhma lam khan Vairengte-I Village Level Task Force (VLTF) Committee chu Vairengte Community Hall-ah thukhawmin COVID-19 hripui leng mek ven hna an thawh dan chungchang an sawiho a. Hemi hnua thuchhuah an siamah Mizoram chak lakna kawngpui ber, NH. 306 kawngpui dung bakah State thenawm Assam State, Hailakandhi leh Cachar District atanga luhkha/kal khan kan neih, Vairengte chhuah lam leh tlak lam-a Duty Post siama ramri hrul-a chhun leh zan zawma an ven mek chu kan State chhunga hripui lut tur dan nan awmzia thuk tak a neih laiin, kan luhka pui ber, NH. 306-ah sawrkar phalna neia lirthei eng chi pawh zalen taka an luh leh chhuah theih reng avanga nitin-a lirthei 100 atanga 200 lai ten NH. 306-ah paltlang leh, Vairengte Police Check Gate bul vela an khawtlai thin chu hripui awlsam taka inkaichhawn theih lakah a himlo hle a an hriat thu an sawi a. Hei vang hian kawng ruk leh kawng tum dang khirh taka lo ven hian awmzia a neilo ta vaklo-a an hriat thu sawiin, hei vang hian nimin atang khan ramri hrul-a Duty Post an neih te chu hnuhkir (withdraw) rih mai nise an ti tih an tarlang a. Khawchhunga mipuite ven leh COVID-19 laka mipui himna tura sawrkar thupek dinglai erawh khauh taka kenkawh zui zel nise an tih thu an tarlang bawk.
Thudawn danin Vairengte VC-I Task Force duty-na hmun hi Police leh Task Force te a huhova an duty-na a ni a, Task Force ten duty in dah tawhlo mai turin thutlukna siam mahse, Police hotute chuan heng duty Post-ah te hian Police te hi duty tir reng an la nih tur thu sawiin, uluk lehzuala Police te an duty tur thu an sawi bawk a. Tunhnai khan sawrkar chuan Police hi a dah belh nia thudawn a ni bawk.
Hetianga Vairengte-I VLTF ten ramri a Mizoram venhim hna an thawh mek chawlhsan rih an tum thu an sawi lai hian Vairengte-a VC-II, VC-III leh VC-IV huamchhunga Task Force te chuan a hmaa an lo kal dan angin ramhnuai a Task Force Duty chu kalpui zel an tum thu an sawi thung nia thudawn a ni bawk.

Comments

Chhiar Hlawhte