Buh leh bal tharchhuak turin CLP Leader in ngen

Congress Legislature Party (CLP) hruaitu, Zodintluanga MLA chuan buh bal leh thlai thar-chhuak tura inpuahchah turin mipui a ngen.

Thorang bialtu MLA ni bawk, Zodintluanga hian Zirtawpni atang khan a bial chhung khaw hrang hrang fang tanin COVID-19 hripui leng mek avanga harsatna tawkte chhawmdawlna a pe a. Hripui leng mekin India ram pawh nasa taka a tihbuai avangin nakum lamah tam tlak a hlauh-awm hle tih sawiin, Mizoram mipuite chu tunah hian mahni lo inpuahchahin, buh leh thlai thar tam tura hmala turin a la tlai lo tih a sawi a, hemi atan hian mipuite chu nasa lehzuala inpuahchah turin a chah bawk.

CLP Leader, Zodintluanga chuan ei leh bar ah India ram mipuiin an thar sa chu tunah hian Mizoram pawhin a la ring rih tih sawiin, he hripui avanga tawrhna hi a la tawp mai dawn lova. Nakum lam thlir a ngai a, tunah hian Lo lamah nasa takin hna thawkin fehchhuah a ngai a, kumina- Lo vat lo te pawhin kang hreng-a Lo atan siam a tul a ni, a ti a. Tunah hian Chul rihna atan pawh a la tlai lutuk lo tih pawh sawiin, “Chul te pawh a thei theiin ritin, buh leh thlai thar tam a ngai a ni,” a ti.

Hei bakah hian Zodintluanga chuan buh leh thlai thar theihna ram nei tha zawk thingtlang lama chengte chu thlai chi hrang hrang chinna atana kang hreng turin a fuih a, kumin atana Lo vat lo te emaw, mahni duh anga zau vat lo te tan pawh Chul rih chu a la tlai loh theih tho avangin a theih ang anga hma la turin a ngen a. “Hnathawk thei tawh phawt chu ram lama intirhliam hun a ni a, he hripuiin tam a thlen theih dan hre reng chungin hnathawkin intirh liam zel a tul a, India ram tam mahse Mizoram tal a lo inphuhruk theih na'n theihtawp chhuah a tul a ni,” tiin mipuite chu a chah bawk.