Mizoram-ah a thlawna thisen pek pung zelin Kum 2019-2020 ah a thlawna thisen pek 90.91% a tling

Sawrkar kum liamta nikumApril 1 atanga kumin March 31 thleng khan Mizoram-a Blood Bank hrang hrangah thisen Unit 30,499 lakkhawm niin heng zinga Unit 27,727 chu mi tlawmngai ten a thlawna an pek niin hei hi thisen pek zawng zawng atanga zaa 90.91 a ni. 

Mizoram State AIDS Control Society (MSACS) chhinchhiahna atanga a lan danin Mizoram pumah hian Blood Bank 11 awm mekin Aizawl District-ah 3 leh Lunglei District-ah 2 awmin a bak District thar nilo, District 6-ah Blood Bank hi pakhat theuh a awm a. Heng Blood Bank hrang hrang 11-ah te hian nikum chhung khan thisen Unit 30,499 pek niin heng zinga 27,727 chu mi tlawmngai ten a thlawna an pek (Voluntary Donation) niin a bak Unit 2772 chu mi tu emaw te tan bika pek (Replacement Donation) a ni thung a, thisen pek zawng zawng atanga chhutin Voluntary Donation hi 90.91 a ni. Sawrkar kum liamta chhung khan Mizoram Blood Bank hrang hrangte hian Blood Donation Camp tum 494 huaihawtin heng ah hian thisen Unit 20,497 lak a ni a, Voluntary Donation zinga Unit 7230 hi a huho-a thisen pekna hun ruahman ni lo ah mi tlawmngai ten anmahni Blood Bank-ah kala an pek a ni bawk.
Blood Bank mal ah Civil Hospital, Aizawl Blood Bank chu Blood Donation Camp huaihawt tam ber niin tum 158 zet Blood Donation Camp hi an huaihawt a, heng ah hian thisen Unit 10,573 lakkhawm a ni a. Civil Hospital Aizawl Blood Bank hi Blood Bank mal-a thisen dawng hnem ber ni bawkin thisen Unit 16047 an dawng bawk a ni. District Hospital Mamit chu hemi hun chhunga Blood Donation Camp huaihawt tlem ber niin tum 19 an huaihawt a, heng ah hian thisen Unit 387 lakkhawm a ni bawk.
District Hospital Serchhip Blood Bank-ah sawrkar kum liamta chhung khan thisen Unit 986 pek niin heng zinga Unit 903 chu mi tlawmngai ten a thlawna an pek a ni a, hei hi thisen pek zawng zawng atanga chhutin zaa 91.58 a ni a. Blood Donation Camp buatsaih ni lova mahni thu-a tlawm-ngaia thisen pe mi 132 an awm bawk a ni.
Mizoram pum chhutin tunhnaiah tlawm-ngaia thisen pek hi a pung chho hret hret a, kum 2017-2018 ah Voluntary Donation hi 83.36% a nih laiin 2018-2019 ah chuan 86.54% ah a pung a, kumin ah 90.91 niin thisen pek hrim hrim pawh 2018-2019 aiin Unit 3420 zetin tun sawrkar kum liamta ah khan a pung bawk a ni.

Comments

Chhiar Hlawhte