Chanchin thar thenkhat :

Relief Fund lut vbc. 6.64

Mizoram sawrkar in thuchhuah siama a tar-lan danin nimin tlai dar 4:00 thleng khan COVID-19 dona tur atana CM Relief Fund a sum lut chu cheng vbc. 6.64 a tling tawh a, heng sum lut atang hian Committee on Utilization of CM Relief Fund for COVID-19 in a ruahman angin a thawh khatna atan Task Force hrang hrang leh Home/Centre te leh mi harsa BSUP-a chengte puih nan cheng nuai 234.50 sem chhuah niin, a thawh hnih na ah state pawn a tangkhangte an awmna State a Mizo Welfare kaltlanga puihna tur leh, sem hmasak a Home/Centre puihna la dawng ve lo te, Mumbai Mizoram House a Mizo awmte test man te, Chin Refugees te puihna leh, ramri veng a tlawmngai duty te YMA Group kaltlanga puihna sem turin cheng nuai 227.965 hman leh niin, heti hian CM Relief Fund semchhuah tawh zat chu Rs. 4,62,46,500 a ni.

Ramri venhim zui leh rel
Vairengte SDO (Civil), Isaac C. Lalrempuia hovin nimin khan Vairengte-a VLTF te chuan Joint Meeting an nei a, he hunah hian Vairengte-I VLTF ten ram him zawkna tur beiseia Volunteer te koh haw an rel chu sawiho niin ramri ven hi kalpui leh nise an ti a, an duhdan te pawh Kolasib Sub-Hqrs. YMA leh Vairengte SDO (C) ten lo bawhzui se an ti a. He hunah hian Vairengte SDO (C) chuan Mizoram-a Non-Essential Commodities lut tam chungchang ah sawrkar in mumal taka kalpui an tum thu a sawi bawk a, heng thil chungchang hi tukin a Kolasib DC in Vairengte a tlawh hunah sawipui a ni bawk ang. Hei bakah Vairengte Police Check Gate leh a thlanglam a awmte hnamdang driver laka an him zawk theih nana hmalak dan turte sawiho a ni bawk.

Myanmari ramri-a duty tlawh
COVID-19 Medical Operational Team te chuan nimin khan an Chairman, Dr. ZR. Thiam-sanga MLA hovin Indo-Myanmar International Border bulhnai a awm Sangau leh a chhehvel khua te tlawhin VLTF hruaitute an kawm.

Assam Rifles in thilpek hlan
Mimbung khuaa awm 46 Assam Rifles Bravo Company te chuan Pathianni khan ramri veng a Duty, Village Level Task Force (VLTF) te chu an duty-na hmunah tlawhin, Face Mask thahnem tak, Thosi len 3 (pathum) leh damdawi chi hrang hrang an pe a, hemi ni vek hian Mimbung khaw mipuite tan a thlawna damlo inentirna hun buatsaihin damlo leh insawiselna nei mi engemawzat an en a, damlo te hnenah an mamawh ang damdawi te a thlawna an pek bakah COVID-19 chungchang te an zirtir nghal bawk. Mimbung hi Myanmar leh Manipur te nena inrina a nih avangin VLTF ten venhim hna ngawrh takin an thawk mek a ni.

Damlo enkawl tha zel
Mizoram-a COVID-19 vei hmuhchhuah awmchhun leh tuna Falkawn ICU-a enkawl mek chu a Sample a khat tawka enfiah reng niin April 24-a Sample lak chu a negative ta tih he damdawi In hotute chuan an sawi a. Amah-erawh chu damlo hi COVID-19 a vei tawh lo ngei a ni tih tichiang tur chuan a zawna darkar 24 dana Sample lak pahnih te a negative ve ve a ngai thung a ni. He damdawi In thuneitute chuan an damlo enkawl mek hi a dinhmun a tha zel tih pawh sawiin, amah pawh a harh that thu leh khum-ah thuchhuak peih a thil ei pawh a tui viau tawh tih an sawi bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn