Mipuite fimkhur turin chah

Mizoram Police te chuan tunlai hian Internet Banking leh Smartphone kaltlanga inbumna a hluar tih sawiin, mipuite chu fimkhur turin an chah.
Mizoram Police chuan tunhnai khan Aizawl Zarkawt Veng-a mi pakhat chu misual, BSNL Office-a thawk anga insawiin Ph. 7001527402 hmanga biain, a BSNL phone post-paid bill la pek loh chungchang ah online-a pe mai tura rawnin, a tanpui theih thu leh heng mobile phone application pahnih Team Viewer Quick Support leh BSNL Wallet (BSNL Mobikwik) te hi playstore atangin a download tir a. A tihtir dan zela tiin phone bill chu ATM Debit Card hmangin an pe fel tih an sawi a. A hnu deuhah Bill an pe tawh ngei tih nemnghehna (confirmation) BSNL site atangin a awmlo tih chhuanlamin a bill pektir dan (process) ngai chiah hian tih nawn tir leh in, hemi chhung hian an account atangin Rs. 45000/- alo la chhuak hman tih an sawi.
Hetiang bawk hian a tukah phone hmanga be leh in, an mobile bill pekna hi a luh nawn avangin an account-ah BSNL in pawisa a pekkir (refund) theih nan Mobile Wallet application chu lo hawng a, an account-ah pawisa a lo lut em tih SBI Quick leh SBI Online Banking hmanga lo en turin a ti leh a, hemi chhung hian Rs. 50000/- chu an account atangin a la chhuak leh tih an sawi a. Amaherawh chu pawisa lakchhuah hriat-tirna (SMS notification) te phone-a an hmuh tak ah chuan inbumna (fraud) a ni tih hre nghalin SBI thuneitute hnenah ATM Card leh Bank Account te khawih chet theihlohin an dahtir (block) nghal a, Aizawl Police Station-ah tun thla ni 16 khan FIR thehluh a ni tih an sawi a. Tunlai-a Lockdown kalpui mek hi misual leh bum hmang te pawhin remchang ah la in chet dan tur an dap ve thuai thin tih hriaa inbumna dang pawh a awm theih avangin mipuite chu fimkhur turin an chah bawk.

Comments

Chhiar Hlawhte