Sawrkar hmalakna tawiawm turin ZPM inpeih

ZPM President, Lalliansawta chuan COVID-19 dona kawnga sawrkar hmalakna a theih chin chinah tawiawm turin ZPM chu a inpeih reng tih a sawi.
Nimin a thuchhuah a siamah ZPM President chuan COVID-19 lakah hian Mizoram State chhunga awmsa te ngawr ngawr chu kan la him hrih viau nia a lan thu sawiin, chuvangin kan ramri chu ven ngun a ngai hle tih a sawi a. India rampum lockdown hi chhunzawm zel a nih pawhin keimahi State bik awmdan tur fel taka ruahmanna siam a ngai tih sawiin, tuna Police Armed Battalion kan neih te chuan Assam, Manipur, Tripura leh International Border Entry/Exit Point kan neih pawimawh zawng zawngah Village Level Task Force (VLTF) te hah taka duty tir ve kher ngai lovin, Ccentral sawrkarin Guidelines a siam angin lirthei lut leh chhuakte uluk leh khauh takin vil se, Mizoran Police an zo lo deuh a nih chuan Central sawrkar hnenah Army emaw, Paramilitary Force te deploy tura ngen mai ni bawk se a ti a. VLTF te chu ramri venna ah hian ti hah ve kher lova âwl tirin, anmahni khawchhung venhimna lamah hneh takin duty zawk se tiin rawtna a siam nghal bawk.
ZPM President chuan rampawn-a Mizoram mi tangkhang te tanpuina pek chungchangah Mizoram chu State rethei leh intodelh lo ber pawl kan ni tih hre rengin, sawrkar dinhmun leh sum harsat zia te hriatthiampui-a sawrkar phurrit siam sak lo leh sawrkar lu ti hai lo thei ang bera awm turin mipuite chu chahin, Bank te a inhawn vek avangin mahni fate leh mahni chhungte tangkhang mekte pawh pawisa a thawn theih reng a nih thu a sawi a. Eng chen nge hripui hian a daih dawn hriat a nih loh avangin kan sum leh pai neihchhun te renchem tak leh awmze nei taka kan hman a ngai tih pawh sawiin, “He hripui reh hnuah kan state budget hi kan la hman ho leh vek tur a nih avangin kan neihchhun te hi awmze nei taka kan hman a tul hle a ni,” a ti bawk.

Comments

Chhiar Hlawhte