Chanchin thar thenkhat :

Vawk lakluh khap a ni

AH & Vety Department chuan Assam-ah Vawk natna chi khat, African Swine Fever (ASF) a len avangin State dang atanga Vawk lakluh an khap. African Swine Fever hi China atanga intan a niin he natna kai Vawk te chu an thih zel avangin leh a invenna damdawi a la awm loh avangin a hlauhawm hle niin AH & Vety Department-a thawktute chuan an sawi a. Tunhnaia he natna ni ngeia rin Vawk 800 vel chu Assam-ah an thih avangin fimkhur thil ah State dang atanga Vawk lakluh hi Department chuan a khap ta a ni. He natna finfiah tur chuan The National Institute of High Security Animal Diseases, Bhopal-ah test a ngai a, India ramah lockdown kalpui anih avanga Thlawhna leh Rel service a awm loh avangin Test theih a ni rihlo thung. ASF vanga Vawk damlo te hi an vun a sen vak a, an kua a tha lo a, an luak bawk thin nia sawi a ni.

Loneitu ten sum hloh nasa

Kolasib District Agriculture Officer, C. Lalremsiama chuan COVID-19 avanga inkharkhip kalpui a nih chhungin thlai chingtu ten Thlai bul nei chi a hun taka an chawh theih loh avang leh, a leitu ten an lei theih tak loh avangin Sawhthing Quintal 760 chuang leh Aieng Quintal 1820 chuang an hralh theih loh thu leh Balhla Quintal 500 vel an dah chhiat thu a sawi a. Heng bakah hian Pang-par pawh engemaw zat chhiain, hetianga thlai thar tihral theih loh avanga sum hloh hi cheng nuai 12 chuang a nih thu a sawi bawk.

A thlawnin Mask sem

Lawngtlai District chhunga Chawntlangpui khuaa MGNREGS hnuaia inhlawh tur mipuite chu an khuaa Village Organisation chuan an inhlawhna hmunah COVID-19 darh palh thei venna atan a thlawnin Hmai tuamna (Mask) an sem a, heng Mask te hi Village Organisation-a tel ten an thui chawp niin mipuite chu midangte nen inhlat a awm ngai pawimawh turin an an chah bawk. Hei bakah hian Village Organisation hian an khuaa miharsa te zawngchhuakin tanpuina an hlan bawk a ni.

UK atanga Vawk lak Mizoram la thlenpui thei rihlo

Mizoram sawrkar-a AH & Vety Department in United Kingdom atanga Vawk tha chi 45 an chah chu Inrinni zan khan New Delhi atang rawn phurh tum ni mah se tunlai hri leng mek avangin thulh a ni. AH&Vety Department thawktute sawi danin UK atang hian Vawk tha chi 45 lei a niin heng Vawk te hi February thla khan New Delhi rawn thlenpui a ni tawh a. New Delhi-ah hian ni 30 chhung dahhran tur anih angin Quarantine Centre-ah dah an ni a, dah hran hun chhung hi zo tawh mahse India ram pumah inkharkhip puan anih avangin Mizoram panpui mai theih a ni ta lo a ni.

AH&Vety Department in ruahmanna an siam dan chuan heng vawk leh anmahni buai-puitu Vety Department-a thawktu mi 3 te chu a bika siam lirthei, motor lian 3 leh motor te 2 hmangin Delhi atangin Mizoram rawn panpui tum a ni a. An rawn paltlang tur State-ah te harsatna a awm loh nan Mizoram DGP chuan State dang DGP te hnenah lo ngaihhnathiam tura ngenna a thlen tawh a. Heng Vawk te hi Thingsulthliah a Vety hmunah dah tum an ni a, hetah hian inthlahpun tirin mipui lei theih tura no neih tir tum a ni.

Police in hmalakna thlirlet

Mizoram Police te chuan Pathianni apianga an tih thin angin nimin khan COVID-19 dona kawnga hma an lak dan thlirletna hun Aizawl ah an nei leh a. Aizawl SP Conference Hall-a he thlirletna hun hi IGP (Law & Order), LH. Shanliana chuan telpuiin COVID-19 darh tur ven nan hmun hrang hrangah Police Force duty thahnem tak dah an nih thu a sawi a, hetihrual hian Police Station, Battalion, Out Post leh duty dang pawh dan pangngai anga chhunzawm mek a nih thu a sawi. IGP chuan hri leng laka Mizoram him theih nan theihtawp an chhuah thu sawiin, Police te chu mipui te tana thlamuanawm ni zel tura a chah bakah Task Force te nena an thawhhona ah lawmthu a sawi bawk.

Dawr hawn phal tan a ni

Ministry of Home Affairs thuchhuak angin Inrinni atang khan nitin mamawh zawrhna chauh nilo, dawr hrang hrang hawn phal a ni ta a, Dawr hawn theihna hmun hi thingtlang ah leh khawpui ah pawh hmun lunlo laiah te a ni a. Dawr nghaktu leh a dawrtu mipuite chu hmai tuamna (mask) hmang vek tur leh Social Distancing ngaipawimawh  tura hriattir an ni bawk. Hetihlai hian Dawr hawn phal hian mipui punkhawm tamna, hmunkhata dawr awm tamna hmun- Bazarpui, Mall leh Market Complex te a huam lova, COVID-19 vei te chenna hnaih a dawr te pawh huam lovin, Internet hmanga sumdawnna, Online shopping chu nitin mamawh thil ah chauh phal a ni a, Zu dawr hawn phal a ni lo bawk.

Pension tih danglam tumlo

Sawrkar laipui chuan Coronavirus leng avangin sawrkar hnathawkte pension hun, kum 50-ah tihhniam a tum nia web news portal-in a tarlan chu thu belhchian dawllo a ni, a ti a, Press Information Bureau (PIB) chuan he thu hi dawt a nih thu sawiin, sawrkarin pension hun tihdanglam tumna a neilo, a ti.

UPC (NEI) in tanpuina hlan

UPC (NEI) chuan tunhnaia Mizoram hmun hrang hranga thli leh ruah avanga chhiatna tawk te hnenah Superintendent Relief Fund atangin tanpuina sum leh pai an semchhuak a. Hliappui khua a Rial avanga chenna In engemaw zat chhia te tan Hliappui VC hnenah Rs. 60,000/- hlanin Darlawn khuaa leimin in chenna In a hnawl sak chhungkaw pakhat leh Sesawng khuaa thli in In a tichhiat chhungkaw 14 te hnenah tanpuina sum fai an hlan bawk a ni.

Sample 3 test leh a ni

Falkawn-a COVID-19 Testing Laboratory-ah nimin khan Sample pathum (3) test niin heng te hi result hriat nghal niin a negative vek a, tun thlengin COVID-19 kai hmuhchhuah belh an awm tawh rihlo a ni. Hetihlai hian Mizoram a he hri kai hmuhchhuah awmchhun pawh enkawl mek niin hma a sawn zel tih damdawi In thuneitute chuan an sawi a, Amah pawh a harh thain Oxygen pek a mamawhna pawh a tlem ve zel tih an sawi bawk.

Hetihlai hian Mizoram-ah nimin thleng khan mi 70673 te enfiah ni tawhin mahni In-ah mi 2449 leh sawrkar hmun siam-ah mi 253 khunghran an ni tawh a, mi 146 sample lak ni tawhin rin-hlelh mi 30 damdawi In ah dah an ni tawh bawk.