COVID-19 dona Committee-ah MLA te an tello - Lalduhoma

ZPM Legislature Party Leader, Lalduhoma chuan, COVID-19 dona kawnga hmalakna ah Opposition MLA-te District Level leh State Level Committee-ah telh an ni ve lo tih sawiin, Sawrkar khalh ngiltu tur leh an kalsual tur vengtu tur ber an nih laiin Sawrkar hmalak dan hriat ve phak loh an ngah tih a sawi.
ZPM Legislature Party Leader chuan, MLA te hi COVID-19 avanga mipuite harsatna hrechiang bertu te zinga mi an ni lo thei lo tih sawiin, “Kan dinhmun erawh a inchenlo hle a, A thenin an bial-ah Sawrkar sumte hial pawh an sem theih laiin, Opposition MLA-te erawh District Level leh State Level Committe-ah te telh an ni ve lova, an tan ngaihdan leh thurawn pek a remchang lo deuh thin a ni,” a ti.
Lalduhoma chuan, Mizo mipui hmun danga tangkhangte chung-chang ah kan hnaivaia awm mi 693 te chu hruai haw turin Sawrkar a inbuatsaih mek ta chu lawmawm a tih thu a sawi a, sawrkarin COVID-19 dona kawnga hma latu tur Task Group 12 lai a din chu a lawmawm em em tih sawiin, chutihrualin an thawkrimin an indaih lo hle a, thawktu pek belh ngai tak tak an awm a ni, a ti a. Kan thalaite zingah tlawmngaia inpe duh kan ngah a rin thu sawiin, “Chutiang ruahmanna chu kan hotu ten nei thuai se a lawmawm ngawt ang,” a ti bawk.
Kan ram sum dinhmun chungchangah Lalduhoma chuan uluk lehzuala kan ngaihtuah a ngai tih pawh sawiin, “Hripui in min han nuai meuh chuan ei leh bar leh sum leh pai-a kan derthawnzia a lo lang a, MIP, NLUP, NEDP leh SEDP hnuaia sum kan sen hnem tawh zia leh kan la intodelh loh si zia te a lang a. Thlam pawh sa thiam lo, hnuhpui leh hnuhhram pawh hre hranglo te kutah kan ram hi kan dah rei lutuk a, tunah a sawhkhawk a lo lang ta a ni,” a ti bawk.
Mizoram State Budget chungchangah hetiang hun hi kan tawng dawn tih hre lovin kumin Budget kha siam a ni tih ZPM Legislature Party Leader chuan sawiin, Budget hi kan hun tawng mil-a herrem tura Special Session hial neih a tul thu a sawi a. “Kan State Budget hman ngai lovin Central Sawrkar atangin PM–KISAN, MGNREGS, PMJDY leh PMUY hnuaiah te sum an rawn pe zung zung a, free ration te thlengin min pe a, hei hian nasa takin min chhawk a ni,” a ti a. “Chief Minister’s Relief Fund-ah hian thawh belh zel ila, Sum renchem dan leh sum tuak dan turah Sawrkar hi finchhuah zelin, tuna Vegetable Supply Chain te pawh hi Sawrkar sum hmang lovin, mimal emaw, Enterpreneur te emaw nen kalpui ta zawk ila, Kan state chhunga company lian ho hi kohkhawm nise,” tiin CM Relief Fund emaw, Disaster Relief Fund-ah emaw CSR an rawn chhunluh dan tur ruahman a tul thu a sawi bawk.

Comments

Chhiar Hlawhte