ZLP in Kuthnathawktute zawk mawhpuh pawi an ti

ZPM Legislature Party chuan Sairang-a thlai hring vawnthatna, Cold Room atanga Aijal Club-a Zikhlum lak chhoh, nasa taka thenfai ngai a nih chungchangah kuthnathawktute zawk mawhpuhna a awm chu pawi an tih thu an sawi.

ZPM Legislative Party MLA- Lalduhoma, C. Lalsawivunga, VL. Zaithanzama, Lalchhuanthanga leh Dr. Vanlalthlana te chuan nimin khan Horticulture Department-in Cold Chain Development Project hnuaia Sairang-a thlai hring vawnthatna, Cold Room an siam chu tlawhin, hemi hnu-a thuchhuah an siamah he Cold Room hi Chief Minister hmalaknaa enchhin a nih thu April ni 4, 2020 khan sawrkar thuchhuak ah tarlan a nih tawh laia, thlai tharte vawnthatna atan an mamawh ngei ngei, Chhuar (rack) an lo la neih loh avanga thlai a nih tur anga dahthat theih a la ni lo chu enfiah tha an tih thu a tarlang a ni.

ZPM Legislature Party chuan Thlai quintal 800 lai dah theihna ah Bawkbawn tlema zawng bag chhunga khungkhawma dah a la ni chauh leh thlai tam tak a tawih ta mai chu pawi an ti hle tih tarlangin, “Hmanni lawkah Cold Room atanga Aijal Club-a Zikhlum lak chhoh, nasa taka thenfai ngai a nih chungchang ah, a kuthna-thawktute zawk mawhpuhna a awm hi a pawi kan ti a. A hmuna kan enfiahna atangin, Zikhlumte hi Cold Room-a dahluh a nih pawh hian thenfai a lo ngai tawh reng a ni tih a hriat a. He Cold Room hi a nihna tur taka hman vat a nih theih nan kan sawrkar hi tun aia nasa lehzuala hma la turin kan ngen a ni,” a ti.

ZPM Legislature Party chuan India State danga Mizo awm, tangkhangte list siam vat tur leh a rang lama lang tlang taka tanpuina te pek an nih theih nana hma la tura sawrkar chu ngenin, Village/Local Level Task Force-ah nitin-a eizawng, an eizawnna kalsan leh thlai chi pawh tuh hman lova hah taka duty-te tan Central leh State sumin a mamawhte hnenah mumal takin chhawmdawlna siamsak turin sawrkar chu an ngen bawk a. Hei bakah hian nitin-a eizawng, Inkharkhipna avanga inhlawh theilo te chu Central leh State sum in chhawmdawl dan ngaihtuah turin sawrkar chu an ngen bawk.

Hei bakah hian ZPM Legislature Party chuan COVID-19 avanga mimal, Pawl leh Kohhran atanga CM Relief Fund-a sum lut te hman a nih dan chu langtlang taka mipui a puangzar tura sawrkar chu ngenin, Thingtlang leh khawpui-a tlawmngaia duty-te'n Covid19 laka invenna atana an mamawh pe turin sawrkar chu an ngen a. Heng te hi ‘Package’ angin sawrkar in puang thei se an duh thu an sawi bawk.