Mamit bialtu MLA in Zomuantlang khua a tlawh

Mizoram sawrkar-a Road & Infrastructure Development Board Vice Chairman leh Mamit bialtu MLA, Er. H. Lalzirliana chuan tunhnaia Chakma ten Mizoram IR Sipai kut an thlakna hmun nia sawi, Zomuantlang chu nimin khan a tlawh.

Coronavirus (Covid-19) hrileng mek Mizoram-a a lo luh lohnana Zomuantlang khua a duty 5th IR Constable pahnih Zairemmawia leh C. Lalhruai-tluanga te'n misual kut an tawrh chungchâng ah a hmun ngeia thil awmdan enfiah tura kal Mamit bialtu MLA hian Zomuantlang khawtlang hruaitute leh Force lam hruaitute kawmin he thil thleng chungchang hi a sawipui a, Mamit bialtu MLA chuan min vênghimtu tur sipaite misual ten kut an thlâk rawn chu pawi a tih thu sawiin, Khawvel-ah hripui hlauhawm tak a leng mek a, mitin kan buai em em laiin suahsual rawngbawl pâwl kan awm hi pawi hle a, tûn ang boruak rit tak kan hmachhawn mek laia, Hnam ang zawng emaw, Chi leh chi anga lo buai hi a hun lo a, Hnam inpum-khatna tichhe zawnga buaina chawkchhuak an awm a nih phei chuan an demawm hle ang, a ti.

Mamit bialtu MLA chuan khawthlang fate chu Hnam hrang hrang awmkhawm, India hnampa Mahatma Gandhi-a'n pangpar huan mawi tak tia a sawite zînga mi kha an ni tih sawiin, “Inlungrual leh inngeih tlang taka khawsa ho tur leh tawrh a tul huna tuar tlanga, tanrual a huna tangrual tur kan ni a. Chi leh chi hnam ang zawnga rilru pu-a harsatna leh buaina siam kan awm chuan kan zavaia tan a pawi thei a ni,” a ti a. Heng hunah hian thudik tawk lo Social Media hmanga vawrdarh awm thin chu a pawi em em tih sawiin, kan ram leh hnam pumkhatna tichhe zawnga thuchhuah leh sawilo tura fimkhur a tul thu a sawi a. Zomuantlang khaw tan hian COVID-19 hrileng do nana hmanrua bakah ei leh in tur a hlan nghal bawk a ni.