Latest News

PM-KISAN pechhuak zel

Union Ministry of Agriculture and Farmers Welfare chuan rampum-a inkharkhip hun chhung hian loneitute leh lo lam hnathawh buaipuia chhawmdawl turin ruahmanna hrang hrang a siam a. Pradhan Mantri Kisan Samman Nidhi (PM-KISAN) Scheme kaltlangin lonei a eizawng mi thahnem tak chu an account ah Rs. 2000/- thun sak an ni tawh a, March ni 24 atanga nimin thleng khan lonei-a eizawng chhungkua vbc. 8.89 te chhawmdawlna pek an ni tawh a, tun dinhmunah hian cheng vbc. 17,793 pekchhuah a ni tawh. Tunah hian a tam zawk chuan an hna an chhunzawm leh tawh a ni.

Bialtu MLA in tanpuina sem
Mamit bialtu MLA leh Road & Infrastructure Develoment Board Vice Chairman, Er. H. Lalzirliana chuan tunkar Thawhlehni leh Nilaini khan a bial chhung khaw hrang hrang 28 fangin Alu Bag 30, Dal bag 26, Purun Bag 22 leh Cooking Oil case 30 bakah Face Mask leh VLTF- te hnenah tanpuina pawisa a hlan leh a, hemi hmalam hian tanpuina thahnem tak alo semchhuak tawh bawk a ni. Mamit bialtu MLA chuan inkhar-khipna kan kalpui mek avangin ramdang atanga kan chawkluh thin ei leh bar thil hrang hrangah duhthusamin kan hnianghnar thei lo tih sawiin, kan ramchhunga kuthnathawktute thawhchhuah ang angte khawtin VLTF kaltlanga mipuite lei theih tura chhawpchhuah a ni chu lawmawm a tih thu a sawi bawk.

Khawzawl-ah thlai chi sem
Krishi Vigyan Kendra (KVK), Khawzawl chuan nimin khan Khawzawl-a loneitu thlan-chhuah mi 11 te hnenah Berul, Behlawi, Bawkbawn, Bawrhsaibe, Samtawk leh Zikhlum chi te an sem chhuak a, loneitu hna thawk tha thlanchhuahte hnenah hian thlai chi sawngbawlna leh lei tih thatna, Bio-Fertilizer sem nghal a ni bawk. Nimin vek khan Horticulture Department chuan Khawzawl-ah hian thil chi chi hrang hrang loneitute hnenah an semchhuak bawk a ni.

Electric line chhia buaipui
Inrinni kalta tlai-a thli tleh avanga Aizawl atanga Champhai tlangdung leh Darlawn tlang-dung kawlphetha pekna, 132kV Line chhia chu siamthat tuma hmalak mek a ni a, tunah hian Electric line lo thlun lailawkna tur chu buaipui mek niin Khua a thata tum anga hna thawh theih anih chuan kar khat chhung chuan tihfel hman an beisei tih thawktute chuan an sawi a. Kawl-phetha banpui (tower) a tluk avanga a thlakna tur ban phun leh tura pawh buaipui mek niin hemi atana bungraw mamawh lakluh dan tur pawh buaipui mek a ni bawk.

TNT leh TBCC-ah thilpek hlan
Mizoram sawrkar din, Vegetable Supply Chain hmingin niminpiah tlai khan TNT, Zuangtui leh Tawngtai Bethel Camping Centre, Sakawr-tuichhun te hnenah Zikhlum quintal 10 ve ve pek an ni a, heng thil pekte hi Horticulture Development Board Vice Chairman, Dr. F. Lalnunmawia, MLA chuan hlanin MIZOFED Chairman, Lal-dawngliana leh Serchip DHO, M. Vanlalzami ten an tawiawm a ni. TNT-ah hian tun dinhmun ah mi 1800 chuang an awm mek a, Tawngtai Bethel Camping Centre-ah hian mi 850 vel an awm mek bawk a ni.

Comments

Popular News (Last 30 Days)