Mizoram-ah PM-KISAN chhawr tangkai mek zel

Mizoram chhunga Loneitu za zela 71chuangin COVID-19 hri darh zel tur ven nana rampum a inkharkhip kalpui a nih chhungin Pradhan Mantri Kisan Samman Nidhi (PM-KISAN) ruahmanna kaltlangin sum-a tanpuina cheng vbc.13.2 an dawng tawh.

Agriculture Department hnuaia PM-KISAN ruahmanna buaipuitute chuan Loneitu 92,201 chu sawrkar laipui ruahmanna-ah hian ziahluh an nih thu leh heng zinga Loneitu 66,108 te chuan inkharkhip chhung, March ni 24 leh April ni 10 inkar khan tanpuina an dawn tawh thu an sawi a. PM-KISAN hmang hian Direct Benefit Transfer System kaltlangin Loneitute hi Rs. 2,000 zel pek an ni a, an Official Website a lun avangin tanpuina dawng zat chiah hi hriat a harsa thung a ni.

March ni 24, 2020 khan Union Ministry of Agriculture & Farmers Welfare chuan rampum a inkharkhip kalpui a nih chhungin Rs. 2,000 zel chu Loneitu chhungkaw 8,89,00,000 tan ruahmanin hemi atan hian cheng vbc. 17,793 ruahman a ni a. Sawrkar thuneitute chuan Mizoram-ah PM-KISAN hnuaiah Loneitu ziahluh zawng zawngte hian he ruahmanna hi an chhawr theih an beisei thu sawiin, inziaklut si, chhawr tangkai ve theilo chu inziahluh dan fel tawk lo, Aadhar leh Voter ID Card fello leh Bank Account dinhmun dah mumallo te an nih thu a sawi. PM-KISAN hnuaia inziahluh hi Block Divisional Officer (BDO) leh Common Service Centre (CSC) 260 in an buaipui a ni.