India hmarchhak State 4-a Mizoram mi te naktuk atangin hruai haw an ni dawn

Mizoram mi leh sa, India hmarchhak State- Tripura, Meghalaya, Assam leh Manipur-a tangkhangte chu tun thla ni 30 atanga May 2 chhung khian hruai haw an ni dawn a, heng State atang hian mi 693 hruai haw tura ruahman niin heng mite hi an khaw hnaih bera Quarantine Facility-ah dah nghal an ni ang.

Heng State 4 atanga Mizoram mi leh sa hruai haw tur chungchang hi nimin khan Chief Minister, Zoramthanga chuan mipuite hnena thuchah a sawiah tarlangin, April 13-a Council of Minister thukhawm in hemi chungchang hi ngaihtuah mah se April 15-ah India sawrkarin lockdown kaihhruaina a tihchhuahah State hrang hrang inkara mipui inkalpawh a khap bur avangin he hmalakna hi a thuanawp ta tih a sawi a. Sawrkar laipui in phalna a pekchhuah theihloh avang leh an awmna State nen remruatna siam a nih chuan thil tih theih a nh thu an sawi bawk avangin Mizoram sawrkar chuan hma a la nghal a. Heng State pali (4)-a tangkhang mi engemawzatte lakchhuah an nih theih nan an tangkhanna State sawrkar dawr niin rem an tih hnuah lakluh an nih theih nan sawrkarin ruahmanna a siam ta tih a sawi.

Chief Minister chuan April ni 30 atanga May 2 inkarah heng State pali-a tangkhangte hi lakluh tum an ni tih sawiin, “Hemi chhunga tih kim hman a ni loh chuan mamawh angin hun pawhsei a ni ang. Assam-ah mi 154, Manipur-ah mi 318, Meghalaya-ah mi 201 leh Tripura-ah mi 20, an vaiin m 693 te lakluh tum a ni a. Chhungtin ten mahni mimal thutlukna an siamna tur erawh chu kal leh a khirh viau theih avangin an fate lehkhazir chhunzawm duh tur, awm tlang law law duh zawk an awm chuan awm tlang kha a remchangah kan ngai,” a ti bawk.

Chief Minister chuan sawrkar in rua-hmanna a siam dan sawiin, mahni motor-a an lo haw pawh rem an tih dawn thu a sawi a, “A lo lut zawng zawngte hi an In lam pan lovin Quarantine Facility-ah ni 14 an awm vek a ngai dawn a. Motor neilote hawna tur motor ngaihtuah dan tur chu Assam leh Meghalaya-ah Mizoram House DRC te, Tripura leh Manipur-ah pawh kan mite aiawh remchang hmangin motor neilote lo haw dan tur remruat turin kan ti a. Hawnna man peksak kan ngailo ve ti thei ten mahni chuanman an pek theih chuan kan lawm khawp ang. Hawn man nei tawh lo mangang zual te chu an hawn man kan pek sak lo thei lo ang a, chungte chu kan pek sak ang,” a ti bawk.

Heng Mizoram-a hruai haw te hi mahni hnai vai-a Quarantine Facility-ah dah an nih dawn thu pawh Chief Minister chuan sawiin, Quarantine-na hmun hi an hawna tur District Hqrs. ah theuh ruahman a nih thu a sawi a. Quarantine-a an luh dawnah Rapid Test Kit hmanga COVID-19 hri an pai leh pai loh Test an nih dawn thu pawh sawiin, “Positive an awm chuan COVID-19 atana ruahman Hospital-ah dah nghal an ni anga. Test-a negative te chauh sawrkar Quarantine Facility-ah dah an ni ang. Ni 14 hnuah an chhuah dawnah check leh vek an ni anga, an negative chuan an In-ah Home Quarantine phal sak an ni ang,” tiin Quarantine Facility hi District hrang hrangah buaipui mek a ni bawk.

Chief Minister chuan Lockdown chu thla khat kalpui a ni ta tih sawiin, “COVID-19 hripui leng chu khawvel leh India ramah a la nasat em em laiin Mizoram kan ziaawm a. Ramchhung State dangte nen kan inzawmna leh inkalpawhna hi tihsual chuan hlauhawmah a tang vek thei a, chuvangin lockdown hi kalpui a tul a ni,” tiin Lockdown avanga khawchhung, ramhnuai leh ramri-a duty te chungah lawmthu a sawi a. Doctor leh damdawi lam mi thiamte leh thawktu dangte chungah leh CM Relief Fund petute chungah pawh lawmthu a sawi a. “Mizoram mipuite thlaphang leh mangangin awm lo ila, Pathian tanpuina in tawngtai chungin thlamuang takin awm ila, fim-khur takin kan kal zel dawn nia,” a ti bawk.