COVID-19 dona chungchangah Prime Minister in ramchhunga Chief Minister te a kawm

Prime Minister, Narendra Modi hovin nimin khan India ram State hrang hrang Chief Minister te chuan Video Conference kaltlangin rampum leh State/UT-a Novel Coronavirus hripui leng do hna leh, he hrileng avanga harsatnate ti ziaawm tura hmalakna hrang hrang an sawiho a, Mizoram atangin Chief Minister, Zoramthanga pawh a tel a ni.

Nimin a Prime Minister hova Video Conference neih ah hian Mizoram Chief Minister hi Health Minister, Dr. R. Lalthangliana leh Home Minister, Lalchamliana te chuan tawiawmin Chief Minister chuan he hripui do tura sawrkar laipui atanga kawng hrang hranga puihna Mizoram in a dawn avangin Prime Minister hnenah hian lawmthu a sawi a. PPE, Test Kits leh Medical Supply dangte a pek bakah sum-a puihna State in a hmuh avangin lawmthu a sawi a. Miharsa zawk ten eitur an tlakchham loh nana thla thum (3) chhung a thlawna buhfai pek an nih avang te leh ni za (100) inhlawhna sawrkar laipuiin pawisa ba a neih pawh rang taka a rawn sanction avang te in lawmthu a sawi bawk.
Chief Minister chuan he hri dona kawnga Mizoram a hmalakna hrang hrang sawiin, COVIDFund atana mipui, Kohhran leh pawl hrang hrang ten phal taka sum leh pai an thawhkhawm thu a sawi a. Tlawmngai pawl te leh mipuiin hlawh beisei lova inpe taka mipui him tlan nana an duty thu pawh sawiin, he hun khirh tak kan tawn mek lai hian In neituten dawr leh In luahman an awl (free) thu a sawi a, Zoram mipuite inthurualna leh thawhhona that thu leh midang tan pawha entawntlak a tih thu a sawi bawk.
Tun dinhmunah Mizoram-ah chuan COVID-19 vei damlo pakhat chauh awmin, that lam a pan chhoh mek thu Chief Minister chuan a sawi a, chutihrual chuan ngaih ti tha mai thei kan la nih rih loh thu sawiin, kan ram thenawmte leh State thenawmah te he natna vei hi an la awm avangin Mizoram chu la inthlahdul mai chi a nih loh thu leh, khauh taka ramri venhim hna kalpui mek chu chhunzawm a tul thu a sawi a. Ramri venhim hna hahthlak tak mai chu theihtawp chhuaha Paramilitary Forces bakah Local Volunteer ten an kalpui mek thu a sawi bawk a. Chief Minister chuan Zoram mipuite chuan sawrkar thuchhuahte an zawm that thu sawi bawkin, State dangte tana entawntlak a nih thu a sawi bawk.
He hunah hian Chief Minister hian Mizoram mamawh hrang hrangte Prime Minister hnenah hian thlen bawkin, Hmanrua mamawh hrang hrangte leh sum a puih State in a mamawh thu a sawi a, Mizoram chu Agriculture a innghat Economy kan nih avangin hemi kawnga hmalak a tul thu te a sawi bawk a. COVID-19 in ram mipui hriselna leh ei leh bar, eizawnna thlenga nasa taka min nghawng dan hre rengin, chumi mil tur chuan Disaster Relief Fund 2020-21 inkaihhruaina chu siam ni se tiin rawtna a thlen bawk.
He Video Conference-ah hian India Prime Minister chuan he hri leng atanga ngai awh tur chuan hun rei tak nghah ala ngaih a rin thu sawiin, he natna hri hian pawi a khawih belh zel loh nan mitin in theihtawp a invengin hma kan lak tlan a pawimawh a ni, a ti a. Tuna Red Zone, Orange Zone leh Green Zone kan then zingah Green Zone a lo tam zel a, heng Green Zone te hi Orange Zone-ah a lo chan mai loh nan State tin ten hmalak a tul thu a sawi a. Prime Minister chuan Chief Minister te chu sik leh sa inthlak in a ken tel natna dang te pawh ngaihtuah tel turin a chah bawk.
Nimin a Prime Minister in State hrang hrang Chief Minister te a kawmna ah hian Prime Minister hi Union Home Minister Amit Shah leh Union Health Minister Dr. Harsh Vandhan-te chuan an tawiawm a. Tun tum hi COVID-19 chungchanga Prime Minister in ramchhunga Chief Minister te tum 4 a kawmna niin March ni 20, April ni 2 leh April ni 11, 2020 khan inkhawmna a lo neihpui tawh a ni

Comments

Chhiar Hlawhte

North Vanlaiphai Village Council-ah inthlanna neih that leh a tul dawn