Duty te mamawh thawn

East Tuipui bialtu MLA, H. Ramthanmawia chuan nimin khan a bial chhunga India leh Myan-mar ramri hrul, Tiau lui kam vela duty te hman turin nizung chakna hmanga êng chhit chi (Solar Light) chi hrang hrang, kawlphe khawnvar (Torch Light) leh Thosi huat chulh chi (Odomos) te chu Aizawl atangin a thawn chho a, heng te hi Tuipuiral Group YMA kaltlangin ramri-a duty te venbuk lamah pek a ni ang. East Tuipui Bial chhung khaw 13-a VLTF te chuan ramri ah Duty post 28 an nei a, Myanmar ramri KM 81 neiin heng Duty post 28-ah te hian chhun zan zawmin ram venhim hna thawkin mi tlawmngaite an duty thin a, a tul angin Duty Post hi siam belh zel tum a ni bawk.

Mizoram mi hruai haw dawn
Mizoram sawrkar in India hmarchhak State 4 atanga Mizoram mi leh sa te hruaihaw a tum mekah District hrang hrangte an inbuatsaih mek a. Siaha District chuan Assam,Manipur, Megha-laya leh Tripura atanga hruaihaw tur mi 58 neiin lawngtlai District chuan hruaihaw tur mi 49 an nei a, Saitual District chuan 65 hruaihaw tur an nei bawk. Tarlan tawh angin Mizoram sawrkar chuan heng State 4-a Mizoram mi leh sa tang-khang mek te hi Vawiin atang hian a hruai haw dawn a, heng mite hi an hriselna enfiah vek tur niin Quarantine Centre-ah ni 14 chhung dah nghal vek tura ruahman a ni.

MST Bus tlanchhuak reng
Mizoram sawrkar-a Transport Department chuan an Department enkawl Mizoram State Transport (MST) Bus te chu Lockdown hnuaiah pawh mipui tangkhang te phur tur leh COVID-19 avanga harsatna awm te sukiang turin an tlan-chhuak reng tih thuchhuah siamin an tarlang a. Chawhrualin nitin Bus 15 vel Duty ang an nih thu sawiin, tun dinhmunah Mizoram chhunga an Station hrang hranga Bus awm te pawh sawrkar in a mamawh huna che chhuak thei turin inrin tir vek an ni tih an sawi.

Mi 3 enkawl dam tawh
Mumbai Mizoram House-a COVID-19 hri kai hmuhchhuah Mizo 7 leh hnamdang pakhat zinga 3 chu enkawl dam an ni tawh a, niminpiah khan Nair Hospital-a enkawl mi pakhat chuan Hospital hi chhuahsanin Seven Hills Hospital-a enkawl midang pakhat pawhin nizan hmasa khan damdawi In a chhuahsan leh bawk a, hemi hma tun thla ni 22 khan Mumbai Mizo-ram House-a COVID-19 hri kai enkawl dam hmasak ber chuan damdawi In alo chhuahsan tawh bawk a ni. Heng damdawi In atanga chhuak te hi Quarantine Facility-ah ni 14 chhung dah a ni ang.

Relief Fund-ah chhunglut
COVID-19 hrileng avanga harsatna tawk te puihna turin leh a tul apianga hman turin Horticulture Officers & Staff Welfare Association, Gen. Hqrs. Aizawl chuan nimin khan Chief Mi-nister's Relief Fund-ah Rs. 8,38,776/- an chhunglut a. Hemi hmalam hian Mizoram Horticulture Service Association member te nikhat hlawh Rs. 2,52,215/- leh Mizoram Horticulture Diploma Holder's Association te thawhkhawm Rs. 1,00,000/- pawh an lo chhunglut tawh a ni. Nimin vek khan Mizoram a State Bank of India-a thawktu te chuanan sum thawhkhawm cheng nuai 7 chu CM Relief Fund-ah an chhunglut bawk.

Report thlirhona nei
Health Minister, Dr. R. Lalthangliana hovin nimin khan Secretariat Conference Hall, Aizawl ah April 24-27, 2020 chhunga Medical Operational Team in Mizoram chhung District leh ramri hrang hrang an tlawhna Report thlirho a ni a. Medical Operational Team in an ngaimawh an thlen zingah hian Ramri, a bikin Myanmar nen kan inkalpawhna khan thenkhat ven hneh loh awm zeuh zeuh chungchang te, Village Level Task Force, a bikin ramri a buk sual-a riak te mamawh chi hrang hrang leh thuamchak dan tur te, Public Health Centre ho thuamchak lehzual dan tur te, ramri a duty VLTF leh khaw kilkhawra awm te mamawh bulpui, a bikin tui thianghlim leh buhfai phuhruk dan tur leh Essential Commodities awlsam zawka ramri a duty ten an lak theihna tur chungchang te a tel a ni.

Comments

Chhiar Hlawhte