Speaker in inkawmna an nei

Lok Sabha Speaker, Om Birla chuan nimin khan ramchuhnga State leh UT zawng zawnga Legislative Assembly Speaker-te chu Video Conferencing neih puiin COVID-19 do kawnga an State theuha Sawrkar hmalakna leh COVID-19 dinhmun te a sawipui a. Mizoram Legislative Assembly Speaker, Lalrinliana Sailo pawh he hunah hian telin Mizoram dihmun leh harsatna te a sawi a ni.
He hunah hian Lok Sabha Speaker chuan Sawrkar Laipui leh State Sawrkar zawng zawng te theihtawp an chhuah zarah COVID-19 chu mipui nawlpui ah a taihdarh (Community Transmission) nia a lang lo chu lawmawm a tih thu sawiin, a darh nasa tur hi a hun taka inkhar-khipna kalpui in a dang a ni, a ti a. Speaker te chu an state theuha chin dan tha an kalpui mek te chu sawi tura sawmin, Assembly zawng zawnga MLA te chu a thei ang anga mipui harsatna te sutkian anih theih nan theihtawp chhuah zel turin a ngen bawk.
He hunah hian Mizoram Assembly Spea-ker, Lalrinliana Sailo chuan Chief Minister, Zoramthanga kaihhruai Sawrkar in COVID-19 dona kawnga hma a lak dan te sawiin, COVID-19 dona kawnga Sawrkar in Kohhran, tlawmngai pawl leh Task Force te thawpui dante pawh a tarlang a. Mizoram mi leh sa State danga tang-khang mek te chu lo ngaihven a, a thei ang anga lo tanpui turin Speaker-te a ngen a. MLA zawng zawngte chu an Bial theuhah State dang mi tangkhang an awm leh awm lohte ngaihven a, a theih ang anga lo tanpui turin All India Presiding Officers Conference hminga MLA te a ngen thu pawh Lok Sabha Speaker hi a hrilh a ni. Hemi hma ni 2 kalta hian Lok Sabha Speaker hian Mizoram Assembly Speaker hi Phone-a bia in Mizoram dinhmun alo sawipui tawh a ni.
He Video Conferencing ah hian All India Presiding Officers Conference (AIPOC) kum 100 tlin lawm chungchang leh AIPOC Conference vawi-80 neih tur chungchang pawh sawiho a ni bawk.

Comments

Chhiar Hlawhte