Mizoram-a Eng chhit man tur bithliah thar niin Unit khat chhit man punna Rs. 1.32 a ni

Manipur leh Mizoram-a Power lama thuneitu sang, Joint Electricity Regulatory Commission (JERC) chuan April, 2020 atanga hman tan turin Eng chhit man Unit khat Rs. 4.96 ni thin chu Rs. 6.28 ah a ti sang a, Unit khat zela a man punna chu Rs.1.32 a ni.

P&E Department-in sawrkar kumthar 2020-21 atana Tariff hman tur a dilna hi JERC chuan ni 28.2.2020 khan Aizawl-a Hotel Floria-ah Public Hearing neiin an thutlukna hi March 20, 2020 khan order a ti chhuak a. Public Hearing-ah hian kumtina thilman pung leh Power mamawh pung avangin Tariff tihsan sawiselna a awm hran lova, mahse P&E Department rawtna ang em em a sanga tisang lo tur leh tihsan anih pawha Consumer te tana phurrit tak nilo tura rawtna a lian hle a. Electricity Act-2003-in a sawi angin Power Supply enkawl nana Revenue sum mamawh, Aggregate Revenue Requirement (ARR) hi power hralhna atanga hmuh let tur a ni a. Chuvang chuan kumtin in JERC hian Tariff thar a bituk thin a ni.

P&E Department hian kumin Financial Year (2020-21) chhunga Power Supply enkawl nan ARR cheng vbc. 684.95 phal sak tura an dil laiin Commission chuan cheng vbc. 463.93 a bituk sak a. P&E Department hian an Revenue sum mamawh hmuhlet nan hian 89.52%-a tariff hmanlai tihsan phalsak turin an dil a. Commission chuan ARR bituk hmuh let nan 26.59%-in tihsan a phalsak a. P&E Department hian Consumer te Eng pek nan Unit khat zelah Rs.10.04 vel a mamawh a, chuvang chuan sawrkarin consumer te Unit khatah subsidy Rs. 3.76 zel a pek sak dawn a ni. Sawrkar subsidy pek zat tur hi a vaiin cheng vbc. 160.67 a ni a. Kumin 2020-21 chhunga consumer te Eng hman zat tura beisei zat hi 427.51MU a ni a, heta tang hian Revenue cheng vbc. 268.46 hmuh beisei a ni.

P&E Department hian kumin chhung hian Small Hydel Project te atangin Kawl-phetha 40.09 MU pekchhuah theih an tum a, phai lam leh Tuirial HEP atangin 654.26MU lei an tum bawk a, Tuirial HEP atangin free share (a thlawna Mizoram chanpual) 16.82MU neih theih an beisei bawk. Power lei nan hian Commission-in cheng vbc. 338.74 a bituk sak a ni.

Tariff thara mi nawlpui Kutir Jyoty (KJ) leh Domestic LT Consumer te Tariff pun dan chu hetiang hi a ni :

(1) KJ-ah hian Fixed Charge/Connection Rs. 20/- atangin Rs. 25/- ah tihsan a ni a, Energy man erawh chu tihsan a ni lo.

(2) Domestic LT-ah kW khata Fixed charge hman lai Rs. 50/- chu tihsan a ni lova, Energy man erawh hetiang hian tihsan a ni-

(i) First 100kWh (Unit 100 thleng) : Rs. 3.10 atangin Rs. 3.30/kWh

(ii) Next 100kWh (Unit 100 dang) : Rs. 3.60 atangin Rs. 4.80/kWh

(iii) Balance above 200kWh (Unit 200 chung lam) : Rs.5.10 atangin Rs. 5.30/kWh