Sawrkar thuneitu te hmalakna avangin New Serchip South VLTF in hna an chhunzawm

New Serchhip South Village Level Task Force (VLTF) te chuan COVID-19 dona kawnga an hmalakna kal mekah sawrkar atanga thlawpna hmu tha tawklo nia an hriat avanga VLTF anga an hmalakna niminpiah tlai atanga an tihtawp hnuah sawrkar thuneitute nen inbiakna neiin nimin tlai dar 5:00 atang khan VLTF anga an hmalakna chu an chhunzawm leh ta.

New Serchhip South Village Level Task Force (VLTF) te hian VLTF anga hma an lakna a harsatna an tawh, sawrkar thuneitute hnena an thlen ah sawrkar atanga hmalakna leh thu lawmawm engmah hmuh tur leh hriat tur a awm loh avanga niminpiah (April 23, 2020) tlai dar 5:00 atanga VLTF anga an mawhphurhna leh hmalakna an tihtawp hnuah nimin chawhma dar 10:00 khan Serchhip District Bawrhsap, Dr. Lalzirmawia Chhangte chuan New Serchhip South VLTF hruaitute hi a Office-ah kawmin, New Serchhip South VLTF in an huamchhunga dân palzuta che nia an sawi, Rimawia, IOC Veng chungchangah Chief Judicial Magistrate, Serchhip hnenah Criminal complaint an thehluh thu a lo hrilh a, VLTF in an vengchhunga awm atana an duhloh vanga Serchhip-a Revenue Department-a Surveyor hna chelh mek atanga transfer tura an phutna erawh an thuneihna piahlam a nih thu a sawi bawk a. New Serchhip South VLTF hian an phut tawh anga transfer a nih theih nana an theih china hmalakpui tura ngen zuiin, hemi hnu hian DC chuan a Officer te nen an lo inrawn tur thu leh an thu ngaichang tura chahin an tin a ni.

Hemi hnu chawhnu dar 2:00-ah New Serchhip South VLTF hruaitute hi Serchhip DC chuan a Office-a leng-ah sawm lehin Rimawia chungchangah hian Chief Secretary hnenah complaint a ziah thu leh VLTF-in an duh ang transfer chungchang pawh a ziah lan thu VLTF te lo hrilhin, VLTF te chu an hmalakna chhunzawm turin a lo ngen leh a ni.

Hemi hnu nimin tlai dar 3:30 khan New Serchhip South Village Level Task Force te hi thukhawm lehin an thilphut chungchanga Ser-chhip District Bawrhsap hmalakna hi an sawiho a. An thilphut hi a hlawhtlin nan thuneituten hma an lakpui nia an hriat thu leh DC lamin CJM-a Crimnal Complaint an thehluh chungchangah pawh hmalakna a awm nghal nia hriat a nih thu sawiin, District Bawrhsap hmalakpuina chu ring ngamin VLTF anga an hmalakna chu chhunzawm leh nise an ti a, nimin tlai dar 5:00 atang khan VLTF hmalakna hrang hrang chu an thawk chhunzawm leh a ni.

Hemi hnu hian thuchhuah siamin New Serchhip South Village Level Task Force chuan an hmalakna an chhunzawm leh thu leh an thilphut hlawhtlinna chu an thlir reng dawn tih an tarlang a. An lungawiloh chungchanga VLTF dangte, Serchhip Sub-Hqrs. YMA leh Serchhip Joint VC bakah mipuite thlawpna ah lawmthu an sawi bawk.