COVID-19 dona chungchang ICT Minister ten sawiho

Union Minister of Electronics and Information Technology, Ravi Shankar Prasad chuan nimin khan State Information & Communications Technology Minister-te Video Conference neihpuiin COVID-19 dona kawnga State hrang hrang hmalakna a sawipui.

He Video Conference-ah hian Mizoram atangin Information & Communications Technology Minister, Robert Romawia Royte telin COVID-19 hripui dona kawngah Mizoram sawrkar in IT Service a hman tangkai thu a sawi a. COVID-19 hripui len laiin, Mizoram chhungah IT Service tha, Telephone Service leh Internet Service khaihlaklo, a bik takin thingtlang leh khaw hla taka awm ten sawrkar thuthar leh pawimawh puan te an hriat theih nan an mamawh thu Union Minister hnenah hian a thlen a. Union Minister chuan IT Minister in a thlen chu a ngaih pawimawh tur thu a sawi nghal bawk a ni.

Hei bakah hian ICT Minister chuan Mizo-ram chu India ram chhungah lockdown puang hmasa ber a ni tih pawh sawiin, Mizoram-a COVID-19 damlo pakhat awm pawh niminpiah khan Test Negative Result a nih thu a sawi a. COVID-19 contact tracing atana sawrkar laipui mobile application siam ‘Aarogya Setu’ chu tha a tih thu pawh sawiin, Mizoram sawrkar pawhin mCOVID-19 application a siam thu leh mCOVID-19 ah hian Aarogya Setu application chhunga awm lo, tualchhung atana tangkai- State sawrkar Guidelines, Inter-District atana mPass, Help line, Local Level Task Force Registration, Quarantine Recording, Monitoring System, Chief Minister’s Relief Fund payment Gateway, Help line leh adangte a awm thu Video Conference-ah hian a sawi bawk. He sawihona hunah hian ICT Minister hi Department hotu pawimawh ten an tawiawm bawk a ni.