COVID-19 Hrileng Hmangin Pathian-in Ban a Phar Ta Em Ni ?

COVID-19 Hrileng Hmangin Pathian-in Ban a Phar Ta Em Ni ?

- Dr. Zaichhawna Hlawndo

He CORONAVIRUS natna hrileng hmang hian leilung leh a chhunga thil awm zawng zawngte siamtu leh neitu PATHIAN in khawvel hi ngawi a Pathian a ni tih hre thar leh turin ban a phar ta a ni thei angem?

Khawvel Roreltute hmaah :

Khawvel lal leh roreltute zingah hian Pathian rawn lo leh a thupek zawm lova rorelna lekkawhtu hi an tam hle. A bikin politician thenkhatte chuan thlantlin an nih hian engkim hi an ta leh thuneihna emaw tih mai tur hian an in luling thin. ‘Pathian duh dan enge ni ang?’ tih aiin an party mi leh sa te tih lungawiloh an hlau va, hleih nei taka roreltute chuan an duhsak bikte tan mifel nih an hlawh. Rorelna diklo avangin khawvel hi a rum mek a ni. Pathian in khawvel roreltute hnenah an chunga thuneitu, engkima thuneitu leh LAL a awm tih hi hrilh hriat a duh hle tawh a ni mai lo maw?

Pathian Awm Ringlo (Atheist) Hnenah :

Khawvel thiamna leh finna lo sang zelah mite chawimawi leh ngaihsan rawn (celebrities) an pung zel. Heng mite zingah Pathian avang chauhva ropuia lang ve leh khawvel a lo awm an ni tih pawh ngaihtuah lova mahni in Pathian ta maite an tam hle. Zofate zingah pawh Pathian leh mihring zah tawk lova ‘Atheist ka ni’ ti te pawh kan lo awm ta hial mai. Heng mite Pathian in a siam leh a hmangaihte hnenah hian ‘Ngawi ula Pathian ka ni tih hi lo hre ve tawh rawh u’ a rawn ti ta a ni thei angem?

Sum Pathian te Hnenah :

Khawvel pum hi sum ngainatna leh duhamna hian a khat ta emaw tih mai tur a ni ta! Khawi ramah pawh hian amah Pathian nilova Sum Pathian a, malsawmtu ngaihsak lek lova duhamna a khat, englai pawh a sum ringawt ngaihtuahtute hnenah Lalpa chuan ban phar meuhvin ‘Ngawi ula malsawmtu PATHIAN ka ni tih hi lo hre ve tawh rawh u’ a ti mek a ni thei angem?

Nunna Sawisatute Hnenah :

Pathian in duh taka a siam taksa, nawmsip bawl nana hmang thintu te. Nunna a siam duat taka enkawl chu sawiloh, duh duh ei leh in leh hur nana hmangtu te. Thing leh mau a siam suasamtu te. Ramsa leh nungcha tinreng a siam duhthala that a, ti thlabar a nghaisa thin tute hi ‘Ngawi ula Pathian ka ni tih leh ka anpuia ka siam thilsiam te ka duhdana enkawltu tura ka ruat in ni tih hi lo hre mawlh teh u’ min ti mek a ni angem?

Infiamna/Inelna (sports) Pathian te Hnenah :

Khawvel mihring zawng zawngte hian infiamna/Inelna hi kan atchilh ta emaw tih mai tur a ni ta! Infiam ve kherlo pawh hian TV leh Mobile phone leh internet atangte hian kan hunawl zawng zawng hnawh khah nan hman kan tum emaw tih mai tur a ni. Sports te hi Infiamna leh intihhlimna ai mahin indona atan te pawh kan hmang a tih theih awm e. Heti tak maia siamtu Pathian ngaihsak lova kan awm hi Lalpa a lungawilo a ni angem? Khawvel infiamna te chu a chawl ta thup mai a nih hi. Zofate abikin thalaite pawh hetiang lama hmasawnna rahbi Thar kan kai mek lai hian ‘Ngawi ula, Pathian ka awm tih hre chungin lo infiam thin tawh ang che u’ tiin min zilh mek a ni thei angem? 

Indo leh in thah chingte hnenah : 

Lal Isua Krista chuan khawvel ah a Lal ram (Kingdom of God) din turin amah tlawm ral raihin khawvel tan a nunna a hlan a. Chutiang Pathian Lalram chu a thlen theih nan lo tawngtai rawh u a ti lawm lawm a. Khawvel chuan a lalna tur leh hnehna a chan theihna turin midangte rahbeh, awpbeh leh tihhlum pawh a pawisa lo. COVID-19 hmangin Pathian in mihring te nunna ngaih pawimawh a tul zia leh hlutzia min rawn zirtir mek a ni thei angem?

Sam 46:10 "Ngawi ula Pathian ka ni tih hre rawh u, Hnam tin zingah chawimawiin ka awm anga, leiah hian chawimawiin ka awm ang" tih ziak ang khan khawvel hnam tinte zingah chawimawiin a awm leh theih nan COVID-19 hrileng hmang hian ban a rawn phar ta a ni mai lo maw? Ngawi tura a tih zawng zawngte hian Lalpa Pathian lam hawia sual sima ngaihdam dil a Eden Thar din a Eden Thar enkawltu rilru put ava hun teh lul em!!