Chanchin thar thenkhat :

Venhimna hmun tlawh zel

COVID-19 Medical Operational Team te chuan Saitual, Khawzawl, Champhai leh Hnah-lan khua te an tlawh hnuah Mimbung, Khaw-kawn, NE. Khawdungsei leh Ngopa khua te chu nimin khan an Chairman, Dr. ZR. Thiamsanga MLA hovin an tlawh leh a, Manipur-Mizoram inrina Tuivai Lei-a Police duty te tlawhin, an mamawh hrang hrang Mask, Tarpouline, Glove leh Sanitiser te an pe a. COVID-19 hripui laka Mizoram himna tura duty an nih avangin sawrkar in anmahniah rinna thuk tak a neih thu leh theih-tawp a kan State him nan hna thawk chhunzawm zel turin an chah bawk.

DC in khaw hrang hrang tlawh

Hnahthial District Bawrhsap leh District Level Task Force on COVID-19 Chairman ni bawk, Vanlalmawia hovin nimin khan Hnahthial SP leh District Hospital-a Medical Officer te chuan Hnahthial District chhunga khaw 5 - Chhipphir, Bualpui V, Lungmawi Pangzawl leh Rawpui khua te tlawhin COVID-19 dona kawnga an hmalakna hrang hrangte an enfiah a, Kohhran leh khaw-tlang hruaitute chu hmalakna kalpui chhunzawm zel tur atana hriattur tul pawimawh hrang hrangte an sawipui bawk a. Heng khaw hrang hrangte hian Bawrhsap hnenah hian an mamawh te lo thlenin Bawrhsap hian Chief Minister's Relief Fund leh District Level Task Force atangin an mamawh zualpui phuhrukna tur sum bakah DLTF in Mask an thui 50 theuh leh a tula an hman atan Silpouline a hlan bawk.

MLA ten buhfai sem dawn

Tuirial bialtu MLA, Andrew H. Thangliana leh Serlui bialtu MLA, Lalrinsanga Ralte chuan an MLA LADS Fund hmangin State pawn atanga buhfai bag 100 ve ve leiin COVID-19 hri lengin a nghawng, an bial chhunga mipui harsa zualte hnenah buhfai hi a thlâwna sem a ni dawn a, Kolasib District Level Task Force hnuaia Essential Commodities Team chuan buhfai sem darh hna hi an thawk dawn a ni.

Health Minister chungah lawm

New Ngharchhip Village Level Task Force te chuan Mizoram Sawrkarin hmun ralmuang leh ralti lo te anga Category C-a a dah avanga an lung-awiloh thu an sawi hnuah bialtu MLA leh Health Minister, Dr. R. Lalthangliana hmalakna a an din-hmun chinfel sak nghal an ni chu lawmawm an tih thu thuchhuah siamin an tarlang a. Mizoram mipuite leh khawtlang him nan theihtawpa sawrkar hma-lakna tawiawm zel an tum thu an sawi bawk.

Mipui hriatthiamna ngen

P&E Department chuan thuchhuah siamin nimin tlai lama thlipui leh ruahpui avang khan Aizawl leh Saitual inkara Electric 132KV line chu Tuirial bulah a hrui a chat niin hriat a ni tih tarlangin, hemi avang hian Saitual, Darlawn, Champhai leh Khawzawl tlangdung te chu nizan khan Eng pek theih an nih loh thu an sawi a. A rang thei ang bera siamthat tum a nih tur thu leh mipui hriatthiamna an ngen thu an tarlang bawk.