Chanchin thar thenkhat :

Rial tla vanga In chhia tam

 Nimin tlai dar 4:30 vela Rial nasa tak tla avangin Hliappui khuaa chenna In awm zawng zawng zatve aia tam chu a chhia nia thudawn a ni. Saitual District chhunga awm, Hliappui khua hi In 400 vel awmna a chhal niin nimin tlai dar 4:30 vel khan Rial tla in nasa takin a nuai a, he Rial tla hian chenna In awm zawng zawng zatva aia tam a dengchhiain Rial in a denchhiat loh hi In 50 vel chauh a awm nia thudawn a ni a, In chhe zinga a tam zawk hi luahzui tlakloh niin In chhia te dinhmun hi zirchian nghal a ni bawk.
Hliappui khua a Rial tla hi a tamin a lian hle nia thudawn a ni a, a lian zual chu Artui aia lian zawk te pawh a nih thu khawtlang hruaitute chuan an sawi a, thuneitute chuan he khua hi thleng nghalin a tul angin an buaipui nghal a ni.

Agri. Minister in tlawhkual
Agriculture Minister, C. Lalrinsanga chuan nimin khan Lunglei District chhunga N. Khaw-lek, Buarpui, Bungtlang West, Changpui, Thenhlum, Tleu leh Bunghmun West khuaa Village Level Task Force te a tlawh a, Lockdown avanga harsatna hrang hrang awm thei ngaihtuahin loneitute pawhin puanven sawichhinga buh leh bal tam thei ang ber thar tura hmalak a tul thu sawiin, “Loneitu mai ni lo, a mimir tin in chuktuah huan te siam a, thlai thar kan uar a tul tak zet a ni,” a ti a. Hun khirh tak kan tawh ah Kuthnathawktute pawi-mawhna a lang chiang hle tih sawiin, “Mizoram-ah pawh buh leh bal thar leh intodelh pawimawhna kawngah harhna a thleng mek a. Agriculture operation hi lockdown hian a phuar ve thiang lova. Kan farmer ten zalen tak leh fimkhur taka thlawhhma an lak hi Sawrkar duhdan a ni,” a ti bawk. Minister hian heng khaw hrang hrang a tlawhna ah hian VLTF te mawmawh a hlan bawk.

I&PR Minister hovin sawiho
Information & Public Relation Minister, Lalruatkima hovin nimin khan I&PR Secretary leh Director bakah Information Officer dang ten I&PR Minister Office-ah COVID-19 lockdown chhunga I&PR hmalaknate an sawiho a. I&PR Minister chuan I&PR Department chu mipuite hnena thudik puangzartu an nih avangin inkhar-khip kalpui chhungin chawl lovin an hna a kal reng tih sawiin, thawktute inpekna ah lawmthu a sawi a. COVID-19 hi engchen nge a len dawn hriat theih a ni loh thu pawh sawiin, mipuite chu englai pawha kan fimkhur reng a tul tih hre thar turin a chah bawk.

MJWS tanpuina pe dawn
Mizoram Journalists Welfare Society Governing Board chu nimin khan Aizawl-a I&PR Director Office-ah thukhawmin District hrang hrang atanga Mizoram Journalist Welfare Scheme (MJWS) hnuaia tanpui dilna lut te thlir hovin mi 2 hnenah Ex-Gratia leh mi 19 hnenah damdawi a inenkawlna senso tanpuina tur tihfel a ni.

Lawngtlai Damdawi In tlawh
Lawngtlai East bialtu MLA leh Agriculture Development Board Vice Chairman ni bawk, H. Biakzaua chuan nimin khan Lawngtlai District Hospital tlawhin COVID-19 dona kawnga an in buatsaihna te a enpui a, Lawngtlai District Hospital-ah hian COVID-19 kai an awm palha a hranga enkawlna tur khum panga (5) awmna buatsaih fel a ni tawh a, damlo enkawlna leh thawktute mamawh pawh chhawp fel a ni tawh bawk.

Doctor leh Press inkawm
Champhai District Hospital Doctor-te leh Champhai-a Chanchinbu mite chuan nimin khan tunlai-a hri leng mek, COVID-19 chungchang ah inkawmna an nei a, he hunah hian Champhai District chu ramri depa awm anih avangin hmun dang aia fimkhur lehzual a ngaih thu tarlan niin hemi atana sawrkar inbuatsaihna te pawh tarlan a ni a, mipui zirtirna nasa lehzuala kalpui dan turte pawh sawiho a ni bawk.

A thlawnin buhfai sem dawn
Coronavirus (COVID-19) hripui leng mek avangin India Sawrkar chuan rampuma mirethei chhuanchham mai tur, AAY leh PHH (Ration Card Eng leh Pawl) te tan thla thum (3 months-April, May & June 2020) atan a thlawna buhfai sem turin ruahmanna a siam a. He buhfai hi thla hnih (2 months quota for April & May 2020) hi vawi khatah a rualin (5kg + 5kg = 10kg per beneficiaries) April 2020 chawlhkar tawp ber atanga sem tan tur a ni a, May 2020 thla tir lamah sem zawh hman tur a ni ang. Hei buhfai sem tura June thla quota chu May thla quota pangngai pek-chhuah ruala pekchhuah tura ruahman a ni bawk.

Mi 69066 endik an ni tawh
COVID-19 avangin nimin khan mi 413 te chu endik leh niin heti hian mi 69066 endik an ni tawh a, mi 2449 te chu mahni In lama inkhung-hrang tura tih niin mi 253 te chu sawrkar hmun ruat bikah inkhunghrang tura tih an ni tawh bawk a, mi 137 te chu COVID-19 Test tura Sample lak ni tawhin COVID-19 kai hmuhchhuah mi pakhat bak an la awm leh lo a, he hri kai nia rinhlelh dahhran mi 28 te pawh damdawi In atanga chhuah tir vek an ni tawh bawk.

Comments

Chhiar Hlawhte