Kolasib DC in ramri hrul-a VLTF Duty te a tlawh

Kolasib District Bawrhsap, Dr. H. Lalthlangliana chuan nimin khan COVID-19 hri laka inven nana ramri dep-a duty-te leh Kolasib District chhung khaw thenkhata Village Level Task Force (VLTF) duty te a tlawh kual a, Vairengte leh Bairabi Screening Point-a mihring phuh thianghlimna Chamber leh Vehicle Sanitization Point te hman theih turin a hawng nghal bawk.

Kolasib District Bawrhsap hian Vairengte, Phaisen, Buhchangphai, Bukvannei, Saihapui 'K', Thinglian, Pangbalkawn, Chhimluang, Meidum, Rastali leh Bairabi Village Level Task Force te kawmin anni hian an duty-na a harsatna an tawh leh mamawh te an lo thlen a. An khaw chhunga ei leh bar leh duty te mamawh hrang hrang te chu Zonal Executive Magistrate te hrilh thin tur leh anni kaltlanga ruahmanna siam a nih thin tur thu DC hian a sawi.

Ramri dep leh khawchhunga duty te inpeknaah Kolasib DC chuan lawmthu sawiin, an thawhrimna fakawm a tih thu a sawi a. COVID-19 hri avangin harsatna eng chen nge kan hmachhawn dawn tih hriat a nih loh avangin hmathlir thui tak nei chunga inpuahchah thiam turin VLTF hruaitute chu a chah a, Kolasib District chhungah thalai tlawmngai, a tul huna duty hah zual te chhawk thei tur a ruahmanna siam mek a nih thu a sawi bawk.

Kolasib DC chuan Screening Point-a Motor kah thianghlimna chu hun engemawchen enchhin a nih hnuah nimin atangin uluk tak leh ngawrh takin Gate kaltlang motor zawng zawng te chu kah thianghlim vek tur a nih thu sawiin, COVID-19 laka kan him theih nana kan zawm tur pawimawh, Mask vuah, Kut silfai ngun, Mihring punkhawm loh leh Hand Sanitizer hman te tha tak a zawm tlat turin a chah bawk.

Kolasib DC in a tlawh heng Village Level Task Force hrang hranga hruaitute chuan harsatna an tawh te pawh DC hnenah hian lo thlenin, ruihhlo zawng a ramri kan tum an awm thin thu te, ramri dep a duty ten thawmthat an mamawh zia te sawiin, Check Gate-a phalna nghaka lirthei tangkhang thahnem tak awm thin chu khawtlang tan a him tawk lo ni a an hriat thu te an lo thlen a, hemi chungchangah hian ruahmanna felfai tak siam turin an ngen bawk. An mamawh lo thlen thenkhat chu a tul anga bawhzui nghal niin ramhnuai a duty te hman tur Solar light engemaw zat chu Kolasib SP, Vanlalfaka Ralte chuan VLTF thenkhatte hnenah a hlan nghal bawk.

VLTF te hi Vairengte-ah hmun 17, Phaisen-ah hmun 8, Buhchangphai-ah hmun 8, Bukvannei-ah hmun 4, Saihapui 'K' ah hmun 2, Thinglian-ah hmun 6, Pangbalkawn-ah hmun 2, South Chhimluang-ah hmun 2, Meidum-ah hmun 2, Rajtali-ah hmun 2 leh Bairabi-ah hmun 28 ah duty mek a ni.