Khawpui-a mirethei te chhawmdawlna sem an ni

UD&PA changtu Deputy Chief Minister, Tawnluia hovin nimin khan UD&PA Department hotute nen khawpui chhung mi retheite tana luanchhuah programme thawhkhatna neih a ni a, he hunah hian BSUP-a cheng chhungkaw 586 hnenah tanpuina sem a ni.
Inkharkhip kalpui a nih avangin rethei zawk te leh nitin-a inhlawhfa te dinhmun nasa takin a nghawng tih sawiin Deputy Chief Minister chuan, an tana luanchhuah hi sawrkarin a ngai pawimawh tih a sawi a. Sawrkarin mahni In leh lo neilo te tana chenna In a buatsaih Aizawl khawpui chhunga BSUP-a chengte tan a thawhkhatna ah tanpuina sem a ni a, hei hi khawpui dang 22-ah te pawh chhunzawm a ni ang, a ti bawk.
Tun dinhmunah Lawipu BSUP-ah chhungkaw 359, Edenthar-ah 104, Rangvamual-ah 123, an vaiin BSUP-ah hian chhungkaw 586 te an cheng mek a. Chhungkaw tin hnenah Alu kg 5, Chini kg 2, Tel liter 2, Dal kg 2, Purunsen kg 1 leh damdawi leina turin Rs. 300/- theuh pek an ni a. Mizoram-ah hian Urban Town Aizawl tiamin 23 a awm mek a. BSUP-a chengte bakah khawpui chhunga miretheite dinhmun zirchiangin sawrkar chuan data a khawn khawm a. A rang lamin heng miharsa Mizoram khawpui hrang hranga awmte hnenah hian chhawmdawlna pek an ni ang.
Survey hi Aizawl-ah chuan UD&PA Directorate in a kalpui a. District dangah chuan District Urban Development Officer (DUDO) te leh Autonomous District Council-ah chuan District Programme Officer ten an kalpui thung a ni.

Comments

Chhiar Hlawhte