YMA in Rs. 238,671/- an hmu

Serchhip Sub-Hqrs. YMA ten COVID-19 vanga ramri hnai-a duty te tanpuina atana Bawm an hun atangin Rs. 238,671/- hmuin heng te hi nimin khan semchhuah nghal a ni.

Serchhip Sub-Hqrs. YMA hian COVID-19 laka Mizoram a him theihna tura Mizoram ramri ven hna tlawmngaia thawktute tanpuina atan hian Serchhip Town chhunga YMA Branch hrang hrang 21-a VLTF te Duty-na hmunah Bawm an hung a, heng an Bawm hun atang hian Rs. 211,776/- hmuin Town pawnlam atangin Bungtlang Bazar Branch, Zote South Branch, Vanchengte, Sialhau, Keitum leh Thentlang te pawhin Bawm te hungin pawisa an rawn thawh bawk a, heta tang hian Rs. 26,895/- hmuh a ni bawk a, heti hian ramri hrul-a duty te tanpuina tana an sum hmuh hi a vaiin Rs. 238,671/- a ni.

Serchhip Sub-Hqrs. YMA hian heng an Bawm hun atanga sum an hmuh te hi nimin vek khan semchhuak nghalin Kolasib Sub-Hqrs. YMA kutah Rs. 100,000/- leh Mamit Sub-Hqrs. YMA kutah Rs. 108,671/- hlanin Serchhip Sub-Hqrs. YMA hnuaia ramri-a duty na nei ten an hman turin Tuichangral South Group YMA hnenah Rs. 30,000/- an hlan bawk a, Tuichangral South Group YMA hnuaia Branch zingah Sailulak leh Lungkawlh Branch te chu Myanmar ramri-ah an duty thin a ni.