Horticulture Department in Serchhip District chhunga khaw hrang hrangah Thlai Chi an sem

Serchhip-a Division Horticulture Officer (DHO) Office hnuaia Horticulture Circle hrang hrangah nimin atang khan kuthnathawktute tan Village Level Task Force (VLTF) te hnenah Thlai Chi chi hrang hrang semchhuah a ni.

Mizoram sawrkar in COVID-19 Lockdown avanga kuthnathawktu ten thlai chi lama harsatna an tawh lohna tura ruahmanna a siam angin Mizoram hmun hrang hrangah thlai chi hi semchhuah mek a ni a, Serchhip DHO hnuaia Circle hrang hrangah pawh nimin atang khan Thlai Chi hi semchhuah niin Serchhip-ah pawh nimin chhun khan Circle Horticulture Office, Serchhip atangin thlai chi hi semchhuah a ni a. Hemi puala inkhawm tawi neih ah Serchhip-a Asst. Divisional Horticulture Officer, Lalnunpuia chuan tuna Thlai Chi an semchhuah chu sawrkar Scheme awmsa atanga kalpui a ni lo tih sawiin, COVID-19 avanga rampum-a inkharkhip kalpui anih mek avangin Serchhip-a loneituten thlai tharchhuah lamah harsatna leh khaihlak an neih loh nan Serchhip Horticulture Division chuan thlai chi an neih ang angte chu a thlawna an sem thu a sawi a. Thlai chi hnianghnara semchuah tur an nei lo erawh chu loneitute leh mipuite hriatthiamna ngenin, a dawngtuten hlawhtlinpui ngei turin leh mahni tan mai nilo, midang tana malsawmna ni thei turin a chah a. He huna Thlai Chi dawngtu Village Level Task Force hotute chu an Thlai Chi dawn ang ang te a daihzai thei ang bera sem turin a chah bawk.

Nimin a Thlai Chi semna hunah hian Serchhip Circle Horticulture Officer hnuaia khaw hrang hrangte hnenah Thlai chi hi sem niin anni hian an huamchhung theuh an an lo sem leh dawn a, nimin vek khan Serchhip DHO hnuaia Circle hrang hrang- N. Vanlaiphai, Chhingchhip leh Thenzawl-ah te pawh Thlai Chi hi sem chhuah a ni bawk.

Serchhip-a Thlai chi sem chhuahna hun hi Biakhmingthanga, CHO Serchhip chuan a kaihruai a, he hunah hian Bean, Behlawi, Antam, Changkha, Hmarchapui, Fanghma, Bawrhsaiabe leh Yard long bean chi te semchhuah niin Vawiin hian mipuite hnenah sem leh beisei a ni a. Tunah hian Thlai Chi engemaw zat chu kawng lakah rawn kal mek ala awm bawk a, Pa Chi (Pa khawi) pawh tunah hian siamchhuah hna ngawrh taka kalpui mek zel a ni bawk.