Chanchin thar thenkhat :

Fall Army Worm awm leh tan

Nikum lama Mizoram-a Vaimim tam tak lo tichhe tawhtu Pangang, 'Fall Army Worm' chu Dialdawk, Lengpui-ah a awm leh tan nia hriat a ni a. Hemi chungchang hi tunkar Thawhtanni khan Agricultural Technology Management Agency (ATMA), Mamit District-a hnathawk ten a hmunah an finfiah nghal a. Finfiah a nih rual hian Fall Army Worm darh zel tur ven nan Pangang thahna damdawi leh Pangang man na hmanrua, 'Pheromone trap' te chu Dialdawk-a Vaimim chingtute hnenah hian an pe nghal bawk a. Heng hmanrua an pek te hman dan tur te leh FAW darh zel tur ven nan a tangkai te an zirtir nghal bawk a ni. 

VC ten hlawh thawhkhawm
Kolasib Village Council Association Member zawng zawng bakah VC Secretary leh Tlangau te chuan an thla khat (1) hlawh theuh thawh-khawmin ramri-a Duty, Village Level Task Force (VLTF)-te hnenah nimin khan an sem a, an sum thawhkhawm hi Rs. 2,27,400 niin State dang nena inrinaa duty VLTF 18-te hnenah an mamawh dan enin an sem a ni. He huna kal VC te chuan hmun thenkhatah duty-te dinhmun a that viau lain hmun thenkhatah chuan khawtual mi ringawt tana hmalak a harsat chin a awm avangin sawrkar in dan leh thupek kengkawh tura a rawihte dah se an duh thu an sawi bawk.

Mamit-ah thlai chi sem
Mamit khawpui chhunga Village Council leh Local Task Force tin ten an huamchhunga thlai chi an semchhuah tur chu nimin khan Mamit Sub-Divisional Horticulture Officer (SDHO), Lalrosanga Khiangte chuan a semchhuak a, Mamit khawpui chhunga VC 6 bakah Phaizau VC huam-chhunga a mamawhtute tan pekchhuah tel nghal a ni. Mamit District hian tun tumah hian Fanghma, Changkha, Bawrhsaibe, Behlawi sei chi, Hmar-chapui, Bean, Behlawi dum chi leh a lian chi, Antam chi hrang hrang leh Snakegourd te an dawng a, khaw dangah pawh sem zel tum a ni.

Chawhmeh lakluh tam tawh
COVID-19 avanga Lockdown kalpui chhunga kut hnathawktute thlai leh thei thar te mipuite hnena hralhna tura din, Vegetable Supply Chain hmalakna hnuaiah March ni 28, 2020 atanga nimin, April 21 tlai dar 5:00 thleng khan Aizawl khawpui chhungah Mizoram khaw hrang hrang atangin thlai thar trip 142 leh pawnlam atangin trip 6 lakluh a ni tawh a. Heng thlai leina zawng zawng hi cheng nuai 94.29265 niin hralhchhuahna atangin cheng nuai 88.98472 hmuh a ni tawh bawk a, nimin khan Zikhlum leh Bawkbawn zawrh leh a ni bawk.

Mizoram dinhmun thar ber
Nimin tlai dar 5:00 thleng khan Mizoram-ah COVID-19 kaihhnawih ah mi 67,936 te endik tawh atangin mi 2449 te chu mahni In lama inkhunghrang tura tih niin mi 253 te chu sawrkar hmun siam-ah inkhunghrang tura tih an ni bawk a. COVID-19 test nei turin mi 135 te Sample lak ni tawhin COVID-19 kai hmuh belh an la awmlo zel a, a kai enkawl mek pawh a dinhmun a tha chho zel niin a lang. COVID-19 kai nia rinhlelh mi 28 te chu Damdawi In-ah dahlut tawhin mi 26 chhuahtir an ni tawh bawk.

Chief Minister's Relief Fund dinhmun
Nimin tlai dar 3:00 thleng khan COVID-19 dona atan Mizoram Chief Minister's Relief Fund-ah cheng vbc. 6.1 a lut tawh a, hemi atang hian Committee on Utilization of CM Relief Fund for COVID-19 in a rel angin April ni 9, 2020 khan Rs. 2,34,50,000 chu Local leh Village Level Task Force hrang hrang puihna turin leh Home leh Centre hrang hrang leh BSUP a cheng te chhawmdawlna atan pekchhuah a ni tawh a, State pawn-a tangkhang tan sum pek tur ruahman leh a ni tawh bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn