State pawn atanga hruai haw turte dahhranna tur chungchang sawihona neih a ni

COVID-19 leng mek avanga State pawn leh hmundang atanga Serchhip District-a rawn lut te khunghranna tura sawrkar in a ruahman, Quarantine Facility atana ruat hmun hrang hrangte dinhmun leh heng Facility te enkawltu tura ruat te chu nimin khan District Bawrhsap, Dr. Lalzirmawia Chhangte hova thlirho a ni.

Serchhip DC Meeting Hall-a he thlirhona hunah hian District Bawrhsap, Dr. Lalzirmawia Chhangte chuan COVID-19 do beihpui thlakna kal zelah Serchhip District chhunga mawhphurhna hrang hrang chelhtuten an hna te tha taka an thawh zel avangin lawmthu a sawi a. Tunah hian State dangah Mizoram mi leh sa tam tak tangkhang mek an awm a, heng tangkhang mek te hi rawn haw thei ta se, helaiah an inkhunghranna tur hmunhma fel fai, mamawh engkim nei sa leh thawktu pawh siam fel sa thlap kan lo neih a tul avangin chutiang ruahmanna siam tura inkokhawm an nih thu a sawi a. State pawn atanga rawn lut an awmin mahni In-ah a inkhung mai theih tawh lova, Sawrkar in inkhunghranna tura a ruahman, Facility-ah te chauh hian dahhran tawh tur an nih thu a sawi bawk.

He Meeting-ah hian Serchhip SP, R. Sathiyasundaram IPS leh Addl. DC. HD. Lalpek-mawia bakah sawrkar hotu pawimawh te telin Serchhip District chhunga Quarantine Facility atana ruahman hmun 17 leh mawhphurhna hrang hrang chelhtute duan chhin te chu chipchiar taka thlirho a ni a, siam that ngai te leh mawhphurtu thlak hlek hlek ngai te siamthat niin; Final Facility List hi mipui hriat theih tura tarchhuah leh a ni ang.

Nimin vek hian Serchhip District chhung mi, State danga tangkhang zawng zawngte dapkhawma chhinchhiahna hna chu Village Level Task Force (VLTF) te nena tangkawpa thawh a ni bawk a, heng te hi VC Area hrang hrang atanga lakkhawm niin heng mite hi sawrkar chuan a remchan angin hruai haw dan a ngaihtuah dawn a ni.